Зохиолч: Радован Зогович
Орчуулагч: Д. Гонгор
Ангилал: Гадаадын уран зохиол
Хэвлэлийн газар: Улсын хэвлэлийн газар
Манай штабт сувилагчаар ирэхийн нь өмнө түүний тухай, ахын нь нас барсан тухай ёстой л үлгэр домог шиг юм харамсаж гашуудсан, гайхан шагшсан өнгөөр бүх л бригадаараа ярилцдаг байлаа. Дайсанд эзлэгдсэн муу ёр шүглэсэн нэгэн бяцхан хот руу шөнийн дайралт хийгээд амжилт ололгүй ухрахад тэр ахтайгаа, бас отрядынхаа комиссарын хамт цуваанаасаа жаахан хоцорчихжээ. Үүрийн гэгээ манхайн цайж алсын бараа мэдэгдэхээр болж байтал түүний баруун гар талд явж байсан комиссар нь хяргуулсан юм шиг ханаран унахад, өмнө нь яваа газар дээрх ганц ах нь мөн л унасан малгайныхаа араас самардаад авах шиг болж гуйваад уначихжээ. Тэр, түрүүлгээ харан ойчсон ах руугаа харайн очиж сөхрөн суугаад өөрөө мэдэлгүй нүдээ анин алгаараа дарснаа санаа алдан агшин зуур дотор нь харанхуйлаад явчхав...
