Зохиолч: Чингиз Айтматов
Орчуулагч: С. Бадраа
Ангилал: Гадаадын уран зохиол Киргизийн уран зохиол
Хэвлэлийн газар:
Үүр хяраалж улам гэгээтэй болов. Газрын бараа аажмаар зурайн, тэнгис далай ч тодрон үзэгдэв.
Шөнийн салхинд уймарсан далайн давлагаа эрэг хөвөө хавиар мөн л цайран үелзэвч эргээс цааш гүн лүүгээ долгион намдаад тэртээ цаана овор их ирэлжээ гялалзан харагдав.
Тэнгисийн зүгээс үүл нүүж далайн эргийн толгодын зүг ойртож байв.
Энд тэнгисийн Алаг хав хэмээх тохойн ойролцоо далай руу хатгаж орсон дов толгод бүхий хойгийн дээр нэгэн онцгой хавцал толгой илхэн харагдах бөгөөд тэрхүү толгойг холоос харахад далайн хөвөөгөөр шогшин яваа том гэгчийн алаг нохой лугаа адил харагдах ажгуу. Хоёр хажуугаар нь элдвийн өргөст бут сөөг ургачихсан, зуны аагим халуун болтол үл хайлах цагаан цас толгойн дээр тогтоод хоёр том чих адил унжчихсан, бас цавь суга аль сүүдэртэй газарт мөн цагаан цас тогтсон тэр Алаг хав хэмээвэл зохих толгой далайгаас ч, ойн зүгээс ч хамгийн түрүүн илхэн харагддаг авай...
