Энэ номыг хоёр зуу гаруй жилийн өмнө Английн зохиолч Даниэл Дефо зохиосон юм. Даниэл Дефо амьдралынхаа туршид олон номыг бичсэн боловч «Робинзон Крузо» шиг амжилт олж байсан ном үгүй билээ.
Хэвлэгдэж гарах үедээ ер бусын их амжилт олж байгаад амархан мартагддаг ном ч цөөнгүй л байдаг билээ! Робинзоны тухай энэ ном нь одоо хүртэл сонирхолтой хэвээрээ байна. Энэ номыг өвгөд дээдсээс эхлээд үр хүүхэд нь хүртэл мөн л амтархан уншсаар байдаг. Робинзон бол эцэж цуцахыг мэдэхгүй, барагдашгүй хүч чадалтай хүн байсны нь тэмдэглүүштэй юм. Хэрэв өөр ямар нэг хүн тийм үхлийн аймшигт байдалд орчихвол үхэж үрэгдэх л байсан байх даа. Байгалийн аймшигт хүчинтэй минут бүрд тэмцэхээ больж, цуцашгүй гараа Робинзон өчүүхэн зуур ч гэсэн хумхиж суувал, усны давалгаанд түүний шидэгдэн гарсан энэ арал нь ёстой л авс нь л болох байсан юм. Гэвч Робинзон бол яваандаа хүссэнээ хийж чаддаг, хөдөлмөрт дуртай, хатуужилтай, ямар ч бэрхшээлийн өмнө бууж өгдөггүй хүн байлаа.
Робинзоны хийсэн ажил бүхэн нь хүнд хүчир байлаа. Алдарт бат цайз барьж чадах болов уу, цайзаа тойруулж хэрэм хашаа барьж чадах болов уу, асар том модоор завь хийж чадах болов уу гэдэг эдгээр бүх ажилд, тэр бүх хүчээ өгч шамдан ажиллаж байгаа нь биднийг ч хүртэл сонирхуулж байна.
Робинзон, шавраар яаж анхныхаа савыг хийсэн, яаж модон уур хийсэн, яаж өөрийнхөө завинд далбаа оёж хийсэн зэргийг нь мэдэхэд их гайхалтай юм.
Тэр ямар ч ажлын тухай ярилаа гэсэн уншигчид бид өөрсдөө л тэр ажилд оролцож эхэлж байгаа юм шиг сонирхолтой ярьж байна. Арал дээр ирсэн анхныхаа өдрөөс эхлээд Робинзон байгалийн давагдашгүй хүчинтэй тэмцэн мод суулгаж, зэрлэг амьтныг тэжээн дасгаж, атар газрыг арвайн талбай болгож хэрэглэж байгаа нь бидэнд их сонирхолтой юм.
Робинзон аль дээр цагт буржуйлэг Англид амьдарч байсан худалдаачин хүн учир, бусад худалдаачдын адил гагцхүү өөрийнхөө ашгийн төлөө санаа тавьдаг байсан юм. Хүнгүй арал дээр ирэх хүртлээ Робинзон зөвхөн ихээхэн мөнгө, бусад эд хогшлыг аль болохоор их олохын төлөө хөөцөлдөж байсан юм. Залуу насандаа Робинзон, Гвинейн хүмүүст очиж, тэд алтны үнэ мэддэггүйг нь ашиглаж хүүхдийн янз бүрийн хув тоглоом, шилэн эдлэл зэргийг аваачиж өгөөд оронд нь их хэмжээний алтан элсийг нь мэхлэн авч хонжиж ч явсан байна. Үнэндээ ч тэр үед ийм хэргийг шившигт явдал гэж үздэггүй байсан юм. Гэвч энэ номд хүний хүч хөдөлмөрт саад бэрхшээлийг давж туулах чанар, зориг төгөлдөр байдалдаа итгэж байсны нь бид үнэлдэг юм.
Энэ номыг 1937 онд Э. Оюун хураангуйлан орчуулж, монгол хэл дээр хуучин бичгээр хэвлэснийг манай уншигчид сэтгэл хөдлөн уншиж байлаа. Гэвч сүүлийн үед энэхүү зохиол ховордож олдохоо больсон ба манай залуу уншигчид үндэснийхээ шинэ үсэг дээр уншиж танилцахад нь зориулж орос хэлнээс монгол хэлнээ хөрвүүлэв.
Редактор Б. Мягмаржав
ГАРЧИГ:
РОБИНЗОН КРУЗОГИЙН ТУХАЙ
НЭГДҮГЭЭР БҮЛЭГ. — Робинзон Крузогийн гэр бүл. — Робинзон төрсөн гэрээсээ оргосон нь
ХОЁРДУГААР БҮЛЭГ. Тэнгис дээрх анхны тохиолдол
ГУРАВДУГААР БҮЛЭГ. — Робинзон олзлогдов. — Оргосон нь
ДӨРӨВДҮГЭЭР БҮЛЭГ. — Зэрлэг хүмүүстэй уулзсан нь
ТАВДУГААР БҮЛЭГ. — Робинзон, Бразилд суусан нь. — Тэр, тэнгист дахиад явлаа. — Хөлөг онгоц нь сүйрэв
ЗУРГААДУГААР БҮЛЭГ. — Робинзон эзгүй арал дээр. — Хөлөг онгоцноос эд хогшил авчирсан ба өөртөө орон сууц барив
ДОЛООДУГААР БҮЛЭГ. — Робинзон шинэ орон сууцад. — Янгир, янзага хоёр
НАЙМДУГААР БҮЛЭГ. — Робинзоны календарь. — Робинзон сууцаа тохижуулав.
ЕСДҮГЭЭР БҮЛЭГ. — Робинзоны өдрийн тэмдэглэл. — Газар хөдлөв
АРАВДУГААР БҮЛЭГ. — Робинзон, эвдэрсэн хөлөг онгоцноос юм олж авав. — Тэр, арлыг нарийвчлан судлав. — Өвдөж гуньж, гутсан нь
АРВАН НЭГДҮГЭЭР БҮЛЭГ. — Робинзон арлынхаа байдалтай танилцав
АРВАН ХОЁРДУГААР БҮЛЭГ. — Робинзон, агуйдаа буцаж ирэв. — Түүний тариалангийн ажил
АРВАН ГУРАВДУГААР БҮЛЭГ. — Робинзон, сав суулга хийв
АРВАН ДӨРӨВДҮГЭЭР БҮЛЭГ. — Робинзон завь хийж, өөртөө шинэ хувцас оёв
АРВАН ТАВДУГААР БҮЛЭГ. — Робинзон өөр нэг жижиг завь хийж, арлыг тойрон явахыг оролдсон нь
АРВАН ЗУРГААДУГААР БҮЛЭГ. — Робинзон янгир тэжээв
АРВАН ДОЛООДУГААР БҮЛЭГ. — Санаанд ороогүй аймшигт явдал. — Робинзон орон сууцаа бэхлэв
АРВАН НАЙМДУГААР БҮЛЭГ. — Арал дээр махчин байдагт Робинзон итгэв
АРВАН ЕСДҮГЭЭР БҮЛЭГ. — Зэрлэг хүмүүс Робинзоны арал дээр дахин ирэв. — Хөлөг онгоц сүйрэв
ХОРЬДУГААР БҮЛЭГ. — Робинзон арлаа орхиж явахыг оролдов
ХОРИН НЭГДҮГЭЭР БҮЛЭГ. — Робинзон зэрлэг хүний амийг аварч, түүнийгээ Баасан гэж нэрлэв
ХОРИН ХОЁРДУГААР БҮЛЭГ. — Робинзон, Баасанг хэлэнд сургаж, түүнтэйгээ ярилцдаг болов
ХОРИН ГУРАВДУГААР БҮЛЭГ. — Робинзон Баасан хоёр завь хийв
ХОРИН ДӨРӨВДҮГЭЭР БҮЛЭГ. — Зэрлэг хүмүүстэй тулалдлаа. — Робинзон, Испани хүнийг чөлөөллөө. — Баасан эцгээ оллоо
ХОРИН ТАВДУГААР БҮЛЭГ. — Арлын шинэ эзэд. — Англичууд ирлээ
ХОРИН ЗУРГААДУГААР БҮЛЭГ. — Робинзон, Английн хөлөг онгоцны ахмадтай уулзлаа
ХОРИН ДОЛООДУГААР БҮЛЭГ. — Далайн дээрэмчидтэй тулалдсан нь
ХОРИН НАЙМДУГААР БҮЛЭГ. — Ахмад дахин хөлөг онгоцныхоо дарга боллоо. — Робинзон арлаа орхиж явлаа
1955 оны хэвлэлийн Хэвлэн нийтлэлийн мэдээлэл:
