Ямар нэгэн наадмын төв талбайг тойрон олон хүүхэд балчир хөөрхөн хоолойгоор гийнгоолон явна. Ширүүн харцтай, том толгойтой, өмссөн хувцас дээрээ маанийн үсэгтэй 12-13 хэрийн насны хүүхэд том хар морь унан явна. Тэр хилэн хар морины зүүн нүдэн дээр хуруу дарам газар цагаан толботой ажээ. Хойноос нь 7-8 насны бяцхан охин Дарьсүрэн нимгэн цагаан эдээр хийсэн богинохон монгол дээл өмсөөд, хүзүүндээ улаан бүч зангидсан нь гал адил улалзана. Дарьсүрэн охин зандан шиг хүрэн морь унасан ажээ. Уралдах морь улам олон болон хуралдаж байна. Хүүхдийн гийнгоолох дуу улам хүчирхэг цуурайтай болон хангинаж морьдын явдал ширүүсэж байгаа нь хүүхэд морь аль алины нь сэтгэл зориг хөгжсөний тэмдэг биз ээ...
