За золиг цаашаа, тэр худалдагч мудалдагч ч яамай!.. Сергей уг нь жаран тав байтугай далан таван рубльтэй явав. Гэвч... Гадаа гарч, тамхиа асаагаад бодов. Яс үнэнээр ярих юм бол ер нь хөдөөгийн шавар шавхайд таарахгүй л гутал юм. Хэрэв авчих юм бол эхнэр нь ч их л гамтай өмсөнө л дөө... Сайндаа сард ганц удаа өмсөж юманд явна биз. Тэгэхдээ шавар шавхайтайд яалаа гэж өмсөх вэ хуурайд л өмсөнө. Уг нь яасан их баярлах бол! Хариад чемоданаа нээж, ийм гутал гаргаж ирээд «Май үүнийг өмс!» гэж байвал ч ёстой л сайхан юм гэдэг чинь тэр дээ!
