Зохиолч: Рафаэль Кальдерон
Орчуулагч: Боржигин Батмөнхийн Энэбиш
Ангилал: Гадаадын уран зохиол
Хэвлэлийн газар:
Том хар нүд нь хөхийж, цөхрөн гайхширсан Хосе Габриель гандаж хатсан өнчин мод шиг хөдлөлгүй зогсоно. Хотол хорвоог хайхрахаа больсон гунигт ховдос шиг Хосе Габриель оромжийнхоо дээврийг тулсан өгөршсөн багана түшиж зогсох бөгөөд түүнээс салдаггүй, орог саарал бохир ч гэсэн ээлтэй, үнэнч нохой дэргэд нь хэвтэнэ. Тэр нохой хуцаж байснаа эвшээгээд дараа нь тариаг нь хадсан талбайг гунигтайяа харна. Тэгснээ сүрьеэтэй хүн ханиаж байгаа юм шиг бүгшин хуцах нь сонстоно. Хосе Габриелийг:
— Ран! гэж дуугарахад нохой номой цэхэр нүдээрээ доош харж урт зууван толгойгоо урд хоёр хөлийнхөө завсар тавиад дуугүй болно.
Эргэн тойронд анир чимээ тасравч халуун салхины сэрчигнэх, хүн, нохойн үе үе амьсгалах, навчнуудын унах чимээ хааяа сонстоно. Анир чимээгүй гэдэг бас өөрийн гэсэн дуутай. Түүгээрээ хүнийг уйтгартай болгодгийг яана вэ.
