Багширсан олон хүн хөдөлж ядан, алгуур зайлахад гудамж руу өргөн зам онгойлоо.
— Юу угтах нь вэ?
— Пармын хүүхдүүдийг угтана!
Пармынхан ажлаа хаяжээ. Үйлдвэрийн эзэд зөөлөрч өгөхгүй ажилчид хэцүү бэрх болоод, хүүхдийн зарим нь өлсгөлөнгөөр халуурч эхлэхэд тэд хүүхдээ цуглуулан Генуя дэх нөхөд рүүгээ явуулсан ажээ. Галт тэрэгний буудлын олон баганын цаанаас жижигхэн хүмүүсийн тэгшхэн жагссан жагсаал гарч ирлээ. Хагас дутуу хувцастай, ноорхой болоод сагсгар, жигтэй маягийн сагсгар амьтад шиг явцгааж байна.
