...Түшмэдийг ингэж доромжлох зарлигийг их шавийн да лам Бадамдорж шанзав өгчээ. Төрийн эрхмийн төлөө болж байсан хар, шар феодалын тэмцэлд үлэмж хонжоо олохын учир Бадамдорж ийм хэрэг хийжээ.

Доромжлогдсон түшмэд гомдол нэхэж заалдахад шавь яам богдын зарлиг гэж уг хэргийг шилжүүлэн аваад ноёд түшмэдийг тус бүр нэгэн мянган зулын үнээр торгожээ. Түүгээр ч барахгүй Богдын дэмжлэгээр Бадамдорж шанзав төрийн эрхийг эзлэн авч улсын ерөнхий сайд болов.

Ингэж шар феодалууд төрийн эрхийг гартаа авч дураараа дургиж эхлэв. Энэ үед орос оронд бадарсан Октябрын их хувьсгалын эрх чөлөөний гэрэл монгол оронд нэвтрэн ирлээ.

Нэгэн дор пролетарийн их хувьсгалаас айн сандарч, нөгөө дор шар феодалуудад хорссон засаг ноёд бахардахдаа балиуснаас атгаж авна гэгчээр хятадад төрөө худалдахаар шийдэж хүрээнд байсан хятадын элчин төлөөлөгч сайд Чин ванд бараалхаж хятад улсад дагаар орж захирагдахыг хүсэв.

Монголын ард түмний олон зуун жилийн баатарлаг тэмцлийн ачаар байгуулагдсан улс төрийг хэргэм зэргээр худалдах үед хүрээнийхэн «богц, богц мөнгөөр богдыгоо худалдсан сайдууд, дэнс дэнс мөнгөөр дэлхийгээ худалдсан сайдууд, магнаг дээлтэй сайдууд гуай, маныгаа худалдаад гялайв уу» гэж гашуун дуу зохион дуулдаг болжээ.

Монголын эзэнт хаант төрийг залгих аятай цагийг хүлээж байсан хятадын хөрөнгөтний засгийн газар төрийн энэхүү наймааг дуртай хүлээн авчээ...