Зохиолч: Азиз Несин
Орчуулагч: Т. Содномдаржаа
Ангилал: турк уран зохиол
Хэвлэлийн газар: Улсын хэвлэлийн газар
Энэхүү шоронд хүмүүсийг хийсэн хэргийн төрөл байдал, насаар ялгадаггүй байв. Нэгэн тасалгаанд хууль зөрчсөн арван настай хүүхэд алах ял заагдсан хүний хамт орж гурван жил суух ч удаа бий. Учир иймд засрахаасаа өнгөрсөн ясны ялтангууд бага хугацаатай хүмүүсээс ямар ч саадгүй барьц хураадаг байлаа. Тэгэхээр тонуулчидтай нэг өрөөнд орсон жаалууд эрхэнд нь бүрэн орж, бүхнээс зүдүү байдаг ажээ. Том толгой ялтангууд, тэдний баруун гарын туслагч нар хийгээд мөн тэдний хажуу бөөрөнд нь хав наалдаж хар амиа зогоогчид дор бүрнээ нэгэн бяцхан зарцтай байх бөгөөд эдгээр жаалуудад тус тусынхаа хайр хишгийг хүртээнэ.
Шоронгийн бүх хулгайч нарын толгойлогч нь нэгэн эр байдаг ажээ. Тэр бээр шоронгийн хаалгыг хэдэнтээ татсаны дараа эцсийн удаа хорин таван жилээр таслагдаж, арвыг нь цааш харуулжээ. Шоронгийн хадааснууд түүний долоон булчирхайг андахгүй мэднэ. Тэр хүн өөрийнхөө зарц хүүхэд шиг л анх удаа арван гурван настай байхдаа шоронд орж түүнээс хойш хэдэнтээ орж гарсны эцэст нэлээд бөх суучихжээ...
