Ай бурхан дээд минь! Энэ юу вэ? Клайд юу бодож байна вэ? Тэр, Клайд Грифитс! Сэмюэл Грифитсийн ач хүү! Түүний сэтгэл юу шүглэв? Хүн алах гэж үү? Энэ юу вэ? Энэ аймшигтай сонин... ямар хорон гайны эрхээр түүний нүдэнд ямагт тохиолдоод байна вэ? Муухай гэмт хэрэг, тэгээд хэрэв илрүүлэх юм бол цахилгаан сандалд суулгах болно. Түүнээс гадна Клайд хэнийг ч, юу ч болсон Робертаг алж чадахгүй. Үгүй үгүй! Үнэндээ тэд тийм сайн байсны дараа үгүй... Гэвч тэр өөр ертөнц... Сондра... Хэрэв одоохон ямар нэг зүйл үйлдэж эхлэхгүй бол Клайд лав цөмийг алдах болно.
Клайдын гар чичирч, зовхи нь татаж, бүх бие нь үснийхээ угт хүртэл дагжиж, бүх бие нь арзасхийж хүйт оргив. Алах уу? Эсвэл наад зах нь гүн устай газар завиа хөмрүүлэх үү, —Энэ нь үнэндээ Пасс нуур дээрхийн адил хаана ч гэсэн тун санамсаргүй тохиолдож болох юм. Тэгээд Роберта сэлж чаддаггүй. Клайд үүнийг мэднэ. Гэтэл Роберта ямар нэг аргаар амиа аварч... хашхирч завинаас шүүрч болох юм... тэгвэл... хэрэв ойр хавьд ямар нэг хүн байж байгаад, сонсож... дараа нь Роберта хэлбэл яана!.. Түүний дух дээр хүйтэн хөлс бурзайж, уруул нь чичирч, хоолой нь гэнэт хатав. Ийм бололцоо гаргахгүйн тулд, Клайд яах, яах... ай үгүй... Клайд тийм хүн биш. Клайд иймэрхүү юм хийж... ямар нэг хүнийг... хүүхнийг... Робертаг... тэгээд бас түүнийг живэх буюу хөвж гарахыг хичээж байхад нь цохиж чадахгүй... Үгүй, үгүй... ингэхгүй л байя! Болохгүй!..