Тачаал шуналын хөгжил бол онцгой үзэгдэл юм. Их оюун ухаантай бөгөөд жүжигчний ааш зантай хүмүүст энэ нь ирээдүйнхээ тодорхой чанарыг хязгааргүй олон нэмэлт тайлбартайгаар өндөр үнэлэх их хүслээр голдуу эхэлдэг. Хар амиа бодогч их ухаантай хүн өөрийгөө бага ярьж бусдаар их яриулахыг хичээдэг. Амьдралд дуртай эрэгтэй, эмэгтэй хүн бүхэн хэрэгцээнийхээ тухай санаа тавихдаа энэ амиа бодсон ааш занг талархан зөвшөөрөх нь их зүйлийг олоход маш тохиромжтой ажээ.

Каупервуд бол төрөлхийн ухаалаг хар амиа бодогч байлаа. Гэхдээ энэ хүн амиа бөөцийлөх, хүнд энэрэнгүй хандах чанарыг ямар нэг хэмжээгээр хослуулжээ. Амиа хичээх үзэл, оюун ухааны сонирхол хоёр урлагтай нягт холбоотой. Санхүүгийн үйл ажиллагаа бол бас л урлаг. Урлаг бол ухаалаг бөгөөд амиа хичээгч хүмүүсийн зальтай нарийн үйл ажиллагаа мөн. Каупервуд жинхэнэ санхүүч хүн юм. Байгалийн бүтээл, түүний гоо үзэсгэлэн, хэцүү нарийн зүйлийн өмнө амьдралын дорой байдалд дарагдан яахаа мэдэхгүй мэлмэрэн гөлөрч зогсохын оронд хурц ухаанаа зарж, тасралтгүй явагддаг санхүүгийнхээ тооцоонд будилаан гаргахгүйгээр, амьдралын сайханд сэтгэл оюунаар цэнгэн баясах азтай арга чадварыг сүвэгчлэн олжээ. Эмэгтэй хүн бүр гоо сайхан аз жаргал, амьдралын онцлог байдал олон талыг ойлгохтой холбогдсон ёс суртахууны талаар бодох доо оршин тогтнож байгаа нийгмийн хэв байдлыг хадгалахыг эрмэлзсэнээс биш, ганц дурлал, насны дурлал хэмээх улиг болсон үзэл санаа байх үндэсгүй гэж Каупервуд итгэжээ. Амьдралдаа нэг л эхнэрт үнэнч байж болно, тэгэх ч ёстой хэмээх үзэлтэй олон хүн санаа нийлж байгаа учир юунд байна? Энэ асуултыг өөрөө хариулж мэдэхгүй байна...