Хэдийгээр япончууд манай цэргийг хэд хэдэн газраар шахаж байсан боловч командаас зөвхөн бэлтгэл хүчнийг Халх голын зүгт татаж одоохондоо зүүн эрэг рүү нь гаралгүй бай гэдэг тушаал өгчээ. Тэр урьдын адил япончуудын гол цохилт нь энд явагдахгүй гэж үзэж байсан ба тэр ч зөв байлаа. Хэд хэдэн явган цэргийн батальон, хэд хэдэн артиллерийн дивизионуудаар дэмжигдсэн танкны хоёр хороогоор япончуудаас 7 дугаар сарын хоёрын орой ба шөнийн турш явуулсан галзуу ширүүнээр халзлан дайрсан аттакууд нь Зөвлөлт-Монголын цэргийн гол хүчнүүдийг энд буюу төв районд барьж байх гэсэн зорилготой төдий байжээ.

Японы цэргийн командлагч дэслэгч-генерал Камацубарын өмнөө тавьж байсан гол зорилго нь энэ аттакуудын халхлалтын дор мөн үеэр хойд үзүүрийн Баянцагааны орчим өөрийн гол хүчнийг шөнө ба өглөөний дотор гэнэтээр баруун эрэг рүү гаргах явдал байжээ. Цаашдаа Япончууд Халх голын дагуу өмнө зүгт ба ар талаас нь голын баруун эргээс шийдвэртэй давшилтыг явуулж хоёр гармыг хоёулыг эзлээд зүүн талын эрэг дээр үлдсэн Зөвлөлт Монголын цэргийн бүх бүлэглэлийг бүслэн авах бодолтой байжээ.

Энэ хэргийн амжилтыг хангахын тулд Япончууд зургаадугаар сарын сүүлчийн өдрүүдэд хилийн районы Жинжин сүм гэдэг фронтын ойролцоо жижиг хот руу хорин таван мянган хүнийг багтаасан их цэргийг нууцаар татан ирүүлжээ. Үүний дотор 23 дугаар явган дивиз, долоодугаар явган дивизийн хоёр хороо, танкны хоёр хороо, инженерийн хороо, хэд хэдэн артиллерийн хороод Манжо-Гогийн тоглоомын цэргийн ангиуд байлаа...