Зохиолч: Бернхард Келлерман
Орчуулагч: Г. Сосор
Ангилал: Германы уран зохиол
Хэвлэлийн газар: Улсын хэвлэлийн газар
Туннелийн аймшигт дэлбэрэлт, түүнээс болсон амь тэмцсэн дүрвэлт, хурал цуглаан, Макийн хэлсэн үг зэргийг Эдисон-Био нийгэмлэг сүүдэр шийнийхээ дэлгэцүүдээр урсгаж тэрхүү хэдэн долоо хоногт гайхам их орлого олов.
Мөн сонин хэвлэлийн газрууд ч; дэлбэрэлт, аврах хамгаалах шуурхай ажил, сүртэй хурал цуглаан, ажил хаялт зэргийг нэгт нэгэнгүй бүгдийг нийтэлж хачирхалтай сонин мэдээг шунахайран гаргаж уншигчдын цангааг тайлж, дэлхий ертөнцийг авхуулсан сониныхоо тэрхүү үерээс зүйрлэшгүй их орлого олон тэсхийтэл баяжиж байв.
Бат бэх мөнгөний авдруудыг хоёр гартаа санжгануулан үгээгүй ядуучуулыг будаа тариа шиг үмхэж, тэдний цус нөжийг хоёр завжаараа гоожуулан буй эрин цагийн мангас махчнаар дүрсэлсэн Мак Алланы зураг бүхий, хүн нийгмийн түүхэн дэх хамгийн ичгүүр сонжуургүй боолчлол, капитализмын сонсогдоогүй харгислал хэмээн Туннел-Синдикатыг нэрлэсэн том том гарчигтай өгүүлэл бүхий сонинууд, таван тивийн ажилчин ангийн хэвлэлүүдийн аварга ротац машинуудаар өдөр шөнөгүй урсаж байв...
