Зохиолч: Й. Авижюс
Орчуулагч: С. Лочин
Ангилал: Гадаадын уран зохиол
Хэвлэлийн газар: Улсын хэвлэлийн газар
Ноён Жюгас аа, нэлээд уянгалаг гүн ухаан ч гэлээ, харамсалтай нь шинжлэх ухааны үндэсгүй юм. Хүчтэй нь хүчгүйгээ устгахгүй бол энэ байгаль дээр юу болохыг та бодоод үз дээ. Тооны хувьд олонхи олон амьтад нь цөөнх шилмэл хэсгээ идээд байвал дэлхийн амьтны аймаг хэдийн устаж үгүй болох билээ. Байгалийн энэ хууль ч хүмүүс бидэнд бас л ижил үйлчилнэ. Харамсалтай нь өвсөн тэжээлтэн олшрох тутам үүнийг улам улам зөрчиж байлаа. Ноён Жюгас аа, та мэтийн нигүүлсэгчид, суу ухаантнууд өөрсдөө эрэмдэг болж хувирахын тулд эрэмдгүүдтэй хэрчим талхаа хуваах ёстой гэсэн энэрэхүйн эсрэг зан суртхууныг шингээн аюултай үзэл санаагаар хордуулж байна. Бид бол тийм биш гэж хариулна. Энэ дэлхий хамгийн хүчтэй, эрүүл чийрэг, авьяастайнх нь билээ. Эрэмдэг бүр хүн төрөлхтөнд дарамт, дэвшлийн зам дахь саад тотгор мөн. Гүйцэд боловсорсон бид шинэ иргэншлийн барилгыг барихад тэд туйпууг нь зөөх заяа хувьтай. Түүх энэ их үүргийг гүйцэтгэхийг германд даалгасан юм. Ноён Жюгас таны нүд итгэхгүй буйг харж байна. Маш харамсалтай...
