Дамбадорж тэр байранд байхдаа л нас барсан даа. Дамбыг “Союз хлебт” очихоос өмнө юм даг. Охтиных дуудаж байна, хоёулаа ир гэсэн байна гэж хэллээ. Би очсонгүй, Дамбадорж ганцаараа очсон юм. Дараа нь авгай нь надад захиа бичээд “5 дахь өдөр заавал хоёулаа манайд ир” гэжээ. Тэд Дамбадоржид “Чи манай коммунист намын гишүүн болоод нутаг руугаа буц, эхлээд хүрээлэнд очно биз” гэж хэлжээ. Дамбадорж 2 дахь удаа очсоныхоо дараа “Намайг монгол руугаа явбал яв гэнэ ээ. Тэгэхдээ коммунист намд ороод яв гэнэ ээ. Ардын намаас хөөлгөчхөөд коммунист намд орно гэдэг ч юу гэсэн үг вэ? Амжихгүй дээ” гэж Дамбадорж хэлэхээр нь би “Намд ороод явахад яадаг юм, ингэж нохой гахайдаа хүргүүлж нүдээ ухуулж байхын оронд намд ороод явахад яасан юм” гэж хэллээ. Тэгэхэд Дамбадорж “Үгүй ээ, амжихгүй, яаж явах вэ дээ. Уг нь ээжтэйгээ уулзмаар л байх юм, аргалын утаа, эсгий гэр санаанд ороод байх юм даа” гэж хэлсэн...
