Зохиолч: Х. Лакснесс
Орчуулагч: X. Гунгаажав
Ангилал: Гадаадын уран зохиол
Хэвлэлийн газар: Улсын хэвлэлийн газар
Энэ хүн хуучин Исландаас гарч Шинэ Исланд орох ёстой байлаа. Ер нь хуучин амьдралаасаа зайлж шинэ сайхан амьдрал эрж явдаг хүмүүсийн зам ийм байдаг байв. Торфи Торфасон өөрийн орон гэр, эд хогшил, үнээ, хонь, морио худалдаад Америкт очихоор бэлтгэв. Энд тэндгүй үзэм болсон энэ оронд том, жижиггүй сайхан ирээдүйтэй учирна гэнэ. Тэр хүн хэдэн хонио илүү үнэ өгсөн хүнд аваачиж худалдав.
Тэр хэдэн хонио хараад баярлаж суудаг бөгөөд ялангуяа хот орж бузар панзчидтай наймаа арилжаа хийж яваад ирэхдээ улам ч их баярлан хардаг байв. Торфид тэр хэдэн хонь нь хүнээс өөрцгүй санагдана. Үгүй хүнээс ч илүү байсан байх! Тэгтэл одоо түүний сайхан зантай, хүний итгэлийг бүрэн татсан хэдэн үнээг нь тууж явахыг хараад зүрх нь эмтрэх шиг болно. Гаднын үл таних хүн хэдэн үнээг нь замаар тууж цааш шилбүүрдэн хөөнө. Торфи эцсийн удаа мориныхоо бөгсийг алгадаж хамгийн өндөр үнэ өгсөн хүнд өгч орхив. Энэ хэдэн морь түүний найдвартай ганц найз нөхөд нь байлаа. Эзнийхээ үгнээс гардаггүй энэ хэдэн морь Торфийн амьдралд багагүй тус болсон бил ээ. Торфи тэдэнд дасаж унага байхаас эхэлж арчилж хамгаалсаар ирлээ.
Одоо яая гэх вэ, Торфи Торфасонд мөнгө хэрэгтэй байсан тул хэдэн морьдоо худалдаж хуучин Исландаас Шинэ Исландад нүүж очихоор завдаж байлаа...
