Авирын Чойжилжав
Монгол улсын соёлын гавьяат зүтгэлтэн Авирын Чойжилжав 1927 онд Завхан аймгийн Алдархаан сумын нутагт төрж, бага дунд сургууль, Худалдааны техникум, Намын шинэ хүчний дээд сургууль, Москвагийн улсын их сургуулийг дүүргэж, сэтгүүлч мэргэжилтэй болжээ.
А.Чойжилжав 1946 онд худалдааны техникум төгссөний дараа барааны мэргэжилтнээр хоёр жил ажиллаад «Пионерын үнэн» сонины газарт шилжин очсоноор сэтгүүлч, нийтлэлчийн замаа эхэлсэн байна.
А.Чойжилжав 1961 оноос эхлэн «Үнэн» сонинд гуч шахам жил ажиллахдаа сурвалжилга, тэмдэглэл, аян замын тэмдэглэл зэрэг зүйлээр шилдэг бүтээл туурвисны дотор найруулал бичих ур чадвараараа тодрон гарсан сэтгүүлч юм.
А.Чойжилжав «Хүний хүүгийн тоос», «Дөл», «Хувьсгалын даалгавар», «Адуучин эрийн бодол», «Модчин», «Ид шид», «Гуравхан жил өнгөрөхөд», «Сартай шөнө», «Ялалтын дохио», «Хөсөрт унасан загалмай», «Харуулын албанаа», «Хөх мөнгөн тэнгэрт», «Хорооны дарга», «Хөдөлмөрөөр өгүүлсэн намтар», «Түүхчин», «Гэрэл», «Арав дахь намар», «Цагаан тавилан», «Тангараг» зэрэг жар гаруй найруулал бичсэн бөгөөд шилдэг найрууллаараа «Үүрийн гэгээ», «Ачтаны шавь ачтан», «Миний өнгөрүүлсэн тоост хорвоо», «Хүний хүүгийн тоос», «Гэрлэсэн сардаа» гэх мэт бие даасан нийтлэлийн ном гаргасан байна.
А.Чойжилжав уран зохиолын орчуулгаар чадлаа сорьж, оросын алдарт зохиолч
В. Г. Короленкогийн «Сохор хөгжимчин» тууж,
Зөвлөлтийн нэрт зохиолч, сэтгүүлч Борис Полевойн «Зэлүүд эрэг дээр»,
Узбекийн ардын зохиолч Рахман Файзийн «Нандин чанар» зэрэг романуудыг орчуулсан байна.
Эх сурвалж: “Л.НОРОВСҮРЭН “СЭТГҮҮЛ ЗҮЙ” (21 боть зохиол)-ийн VII боть “МОНГОЛЫН СЭТГҮҮЛЧИД-1”-ээс
