СТЕФАН ЦВЕЙГ
(1881 — 1942)
Сонгодог бичгийн зохиолчдын дотроос сэтгэлзүйн их мастер гэж алдаршсан хүн бол сонирхол татам, огцом хурц үйл явдалтай богино хэлбэрийн өгүүллэг, тууж бичдэг австрийн зохиолч Стефан Цвейг юм.
С. Цвейг 1900 онд уран бүтээлээ эхэлж, бараг 40 гаруй жил энэ ажилд авьяас билиг, хүч чадлаа зориулсан хүн билээ. Бага наснаасаа энэрэнгүй үзлийг хүндэтгэн биширдэг болсон нь уран бүтээлд тодорхой тусжээ. Хүний дотоод сэтгэлийг бичих талаараа тэр дэлхийн утга зохиолд зүй ёсоор хүндтэй байр эзэлдэг.
С. Цвейг Австрийн нийслэл Вена хотын боловсролтой язгууртны гэр бүлд төржээ. Уран бүтээлийнхээ ажлыг утга уянгын шүлгээр эхэлж, анхны түүврээ «Мөнгөн хүрхрээ» нэртэйгээр 1901 онд хэвлүүлжээ. «Эрика Эвальдийн дурлал» гэдэг өгүүллэгийн түүвэр нь 1904 онд хэвлэгдэж түүний нэрийг Европын шилдэг
зохиолчдын эгнээнд хүргэжээ. «Амок» (Улангаслал), «Танихгүй эмэгтэйн захидал» зэрэг дэлхийн утга зохиолын эрдэнэсийн санд С. Цвейгийн нэрийг мөнхөлсөн шилдэг бүтээлүүдээс гадна бас утга зохиолын шүүмжлэл, гайхамшигт хүмүүсийн намтар зохиол, эсээ, найрууллын цуврал ном хэвлүүлжээ.
Тэдгээрээс «Варлен», «Эмиль Верхарн», «Бальзак, Диккенс, Достоевский», «Ромен Роллан», «Шуламтай тэмцсэн нь», «Стендаль», «Толстой», «Эразм Роттердамын ялалт ба эмгэнэлт явдал», «Магеллан» зэргийг онцлон дурдах хэрэгтэй. А. М. Горький түүний «Танихгүй эмэгтэйн захидал», «Сарны гэрэл дэх нарийн гудам» зэрэг өгүүллэгийг нь уншаад зохиолчид илгээсэн захидалдаа: «Бүсгүй хүнд гойд энхрий хандаж чин зүрхнээсээ бичсэн эдгээр зохиол сэтгэлийг минь нэн их догдлууллаа» гэж бичсэн байдаг.
С. Цвейг 1930-аад онд ЗХУ-д зочлон ирж байжээ. Тэр 1934 онд Бразилд очсон бөгөөд хүн төрөлхтөн, ялангуяа Европын улс түмэнд тарьсан дэлхийн II дайны гай гамшиг зохиолчийн сэтгэл санаа, ёс суртахууны гүнзгий хямралын шалтгаан болж эмгэнэлтэйгээр ертөнцийг орхин одсон юм.
С. Цвейгийн «Танихгүй эмэгтэйн захидал» зэрэг зохиол нь монгол хэлээр орчуулагдан гарчээ.
Эх сурвалж : "Хүүхэд залуучуудын нэвтэрхий толь - 3" (1988 он)
