ЦАХИМ НОМ

Ф. Зальтен

«Бээмбий»-г зохиосон Зальтен Феликс (жинхэнэ нэр нь Зигмунд Зальцман) нь 1869 онд Будапештад төрж, 1945 онд нас баржээ. Австрийн нэрт зохиолч билээ.

Ф. Зальтен маш олон янзын уран бүтээлийн өв үлдээсэн байна. Роман, жүжиг, өгүүллэг бичиж театр, хөгжим, утга зохиолын тухай олон тооны өгүүлэл хэвлүүлжээ. Ф. Зальтен нь ан амьтны тухай бичсэн номоороо хүүхдийн халуун хайрыг булаасан зохиолч байжээ. ан гөрөөнд маш дуртай байсан байна. Ан амьтдын амьдралыг байгалийн нөхцөлд судлахын тулд олонтоо жуулчилдаг хүн байжээ. Ан гөрөө хийж явах үедээ ажигласан, сэтгэл санааг нь догдлоосон сонин үйл явдлуудаар өөрийн бичих өгүүллэгүүдийг тогтмол баяжуулдаг хүн байжээ.

Ф. Зальтен нь нийтдээ ан амьтны тухай арав орчим ном бичсэн байна. Тэдгээрийн дотроос хамгийн их алдаршсан нь таны анхааралд толилуулан буй энэхүү «Бээмбий» гэдэг үлгэрэн тууж юм. «Бээмбий» бол ойн амьтдын тухай нэгэн бугын амьдралаар төлөөлүүлэн өгүүлсэн үлгэрийн ном юм. Энэхүү ном нь байгаль орчноо хамгаалах үзлээр хойч залуу үеэ хүмүүжүүлэх эрхэм зорилт тавигдаж байгаа одоо үед хүүхэд багачуудад байгалийн зарим хууль зүй, ан амьтдын амьдралын тухай танилцуулж, тэднийг хайрлах сэтгэлийг төрүүлж өгөхөөр бичигдсэн байна.

«Бээмбий» анх 1924 онд Австрид нийтлэгдсэнээс хойш олон улс оронд орчуулагдан өдий төдий удаа хэвлэгджээ. «Бээмбийг» ЗХУ-д зөвхөн орос хэлээр 2 удаагаа олон мянган хувиар нийтэлсэн байна. Англи хэлээр Английн нэрт зохиолч Жон Глосуорси орчуулж 1942 онд Америкийн найруулагч зураач Уолт Дисней «Бээмбий»-гээр мультфильм зохиожээ.

1945 онд Швейцарт ан амьтдын амьдрал харуулсан шилдэг өгүүлэлд олгох «Бээмбийн» нэрэмжит уралдаан зарлаж байжээ. Тэр ч байтугай хөл бөмбөгний «Бээмбийн нэрэмжит» шилжин явах шагнал хүртэл тогтоогдож байв.

Ийнхүү энэ ном түүнд гарах баатрууд нь ихэд алдаршиж өргөн олон уншигчдынхаа дур сонирхлыг булааж чаджээ.

Эх сурвалж : "Ф. ЗАЛЬТЕН : БЭЭМБИЙ (Ойн үлгэр)" АРДЫН БОЛОВСРОЛЫН ЯАМНЫ ХЭВЛЭЛ 1977, номоос

Зохиолч (орчуулагч)-ийн номууд

Өнөөдөр: 8076
Сүүлийн 7 хоног: 57246
Сүүлийн 1 сар: 256107
Нийт хандалт: 9595592