ТҮВДЭНСҮРЭНГИЙН ЖАМЪЯНСҮРЭН
(1932-1994)
Хүүхдийн зохиолч Т. Жамъянсүрэн нь 1932 онд Архангай аймгийн Тариат сумын Гичгэнэ хэмээх газар ард Түвдэнсүрэнгийн ууган хүү болон төржээ.
Улмаар сургууль соёлын мөр хөөж бага, дунд, бүрэн дунд сургууль, 1963 онд Москва хотноо Комсомолын дээд сургууль, 1965 онд Багшийн дээд сургууль төгсжээ.
Т. Жамъянсүрэн улсад ажилласан цагаасаа эхлэн хүүхэд залуучуудын дунд байж, тэдэнтэй өдөр тутам уулзан учирч явсан нь хүүхдийн зохиолч гэсэн эрхэм алдрыг хүлээх нэгэн боломжийг нээж өгсөн ажээ.
Намтрын нь хуудсыг сөхвөл Архангай аймагт багш, хичээлийн эрхлэгч, "Залуучуудын үнэн", "Пионерын үнэн" сонинд утга зохиолын ажилтан, Өмнөговь аймгийн ХЗЭ-ийн хорооны 1-р нарийн бичгийн дарга, МРТЭХ-нд редактор, хариуцлагатай редактораар ажиллажээ.
Т. Жамъянсүрэн нь МАХН, МЗЭ ба сэтгүүлчдийн эвлэлийн гишүүн юм. Түүний хөдөлмөр уран бүтээлийг үнэлж Алтангадас, Хөдөлмөрийн хүндэт медаль, Залуу үеийг халамжлан хүмүүжүүлэгч, Ардын боловсролын тэргүүний ажилтан, Монголын радиогийн тэргүүний ажилтан, МХЗЭХ-ны хүндэт үнэмлэх, хэд хэдэн байгууллагын ойн хүндэт тэмдгүүд, Ардын хувьсгалын ойн медалиуд, Социалист хөдөлмөрийн гавшгайч гэсэн шагналуудтай байжээ.
Түүний бичсэн хошин шог аяс бүхий шүлэг, өгүүллэг, үлгэр, зүйр цэцэн сургаал үгнүүд нь хүүхэд багачуудын танин мэдэхүйн хүрээг өргөжүүлж, тэдэнд гэгээрэл бэлэглэж, эрдэм боловсролтой, ажилч хичээнгүй, саарыг жигших, сайныг дагахыг сургамжилсан аястай байдаг билээ.
Хүүхдэд зориулан маш олон бүтээл туурвисан ба түүний бүтээл нь орчин цагийн аман зохиолын хэлбэр бүхий оньсого, таавар, зүйр цэцэн үгс, жүжиг, хэл зүгшрүүлэх үг, тоглоом зэргээр маш арвин баялаг билээ.
1960 оноос уран зохиол бичиж, голцуу хүүхдийн зохиолын ном хэвлүүлжээ. 1993 онд “Аргай даргай дүг” номоороо МЗЭ-ийн шагнал авчээ.
НОМУУД
Тэр юу вэ? УБ. Гэгээрлийн яам. 1960. 13х
Санаж явахад чинь санамж. УБ. 1961.39х
Хэн ярих вэ, хэн хэлэх вэ, хэн таах вэ? 1964
Зурам хөтөлсөн чогчиго. УБ. 1969. 38х
Эв зүй. Гэгээрлийн яам. 1969. 61
Аяны хонх. УБ. Гэгээрлийн яам. 1971.45х
Ойн толь. УБ. Гэгээрлийн яам. 1975. 138х
Аргай даргай дүг. 1977. 49х
Хэн хэлнэ вэ. УБ. Улсын хэвлэл. 1979. 39х
