(1892-1927)
Өнөөдөр Японы орчин үеийн уран зохиолыг үндэслэгч, алдарт зохиолч АКУТАГАВА РҮНОСКЭ
Тэрээр худалдаачны гэр бүлд төрсөн бөгөөд нялх байхад нь эх нь галзуурсан тул нагац ахындаа үрчлэгджээ. Багаасаа авьяас билиг нь тодорсон агаад тэрбээр 11 настай байхдаа ангийнхантайгаа нийлэн гар бичмэл сэтгүүл гаргаж, 14-тэйдээ Х.Ибсен, А.Франс нарын зохиол бүтээлийг сонирхон уншдаг байжээ. Тэрээр Токио хотод Эзэн хааны их сургуульд суралцаж төгссөн.
Түүний эрхлэн гаргадаг байсан 'Шиншиче' сэтгүүл нь олон зохиолчийн уран бүтээлийн индэр болж байжээ.
Акутагава 1912 оноос уран бүтээлийн гараагаа эхэлж сэтгэл зүйн болон түүх, домгийн сэдэвтэй өгүүллэг, туурь туурвих болсон ажээ. Түүний анхны өгүүллэг нь 'Расёмоны хаалга' бөгөөд хожим нь тухайн үеийнхээ аж амьдралыг харуулсан сэтгэл зүйн сэдэвтэй 'Эцэг', 'Хамрын алчуур', 'Арван иений цаасан мөнгө' зэрэг зохиолоо туурвижээ. Түүний 'Расёмоны хаалга', 'Хамар', 'Ганцаардлын там', 'Зутан', 'Япон улсын дайнч бодлогыг шүүмжилсэн нь', 'Момотаро', 'Сармагчин', 'Генерал' зэрэг өгүүллэгүүд нь уншигчдын дунд ихээхэн алдаршсан. Тэрээр өгүүллэг, туурь, жүжиг, яруу найраг зэрэг уран зохиолын олон төрөл жанраар бичдэг зохиолч юм. Түүний олон зохиол дэлгэцийн алдарт бүтээл болжээ. Японы зохиолчдоос гадаадад хамгийн их алдаршиж, олон улс оронд ном бүтээл нь өргөн орчуулагдсан зохиолчдод зүй ёсоор орно.
Сэтгэл зүйн хүнд дарамт, хувирал өарчлөлтийг харуулсан Акутагавагийн өгүүллэгүүд Японы уран зохиолд шинэ хуудсыг нээж, түүнийг Японы уран зохиолын нэгэн 'сартаваахи' хэмээн алдаршуулсан. Акутагаваг япон төдийгүй дэлхийн утга зохиолын алтан сан хөмрөгийн салшгүй нэг хэсэг гэж үздэг. Судлаачид түүний уран бүтээлийг ХХ зууны нэгэн тод, хосгүй үзэгдэл хэмээн үздэг.
Акутагава Рүноскэ амьдралынхаа төгсгөлд "Хүний амьдрал тамаас ч илүү там" гэсэн аймшигт бодолд хүрчээ. Тэрээр 1927 онд 35 насандаа амиа хорлож үхсэн бөгөөд түүний үхлийн талаар янз бүрийн таамаг байдаг ч 'эхийнхээ адил өөрийгөө галзуурчих вий гэсэн айдас нь үхэлд хүргэсэн' гэсэн таамаг илүү үнэнд ойртдог.
Эх сурвалж : https://www.facebook.com/byambajav.gombojav
РЮНОСКЭ АКУТАГАВА (1892—1927)
«Хүний амьдрал гэдэг олон хуудас нь дутуу номтой төстэй юм. Тэр ном бүрэн бүтэн эсэхийг мэдэхэд бэрх. Гэвч ямар ч байлаа гэсэн хүний амьдрал гэдэг нэг бүтэн хувь ном мөн» гэж бичиж байсан хүн бол өөрийнх нь амьдрал, уран бүтээл хуудас бүрэн ботитой адил хэмээн нэрлэгддэг Японы нэрт зохиолч Акутагава Рюноскэ юм.
Орчин үеийн японы утга зохиолыг үндэслэгч, нэрт зохиолч Акутагава бүр оюутан ахуй цагтаа бичсэн «Расёмон» гэдэг өгүүллэгээрээ уншигчдын анхаарлыг татжээ. Түүний дараа гарсан «Хамар» гэдэг өгүүллэг нь нэрт зохиолчийн эгнээнд хүргэсэн юм. Тэр «шинэ уран бүтээлийн сургууль» хэмээх утга зохиолын чиглэлийг тэргүүлж зохиол бүтээлээ хуучин үлгэр, домог, онцгой сонин үйл явдлын сэдвээр туурвиж эхэлжээ.
Цаашдынхаа уран бүтээлд хүний дутагдалтай талыг хурцаар шүүмжилж, нийгмийн өргөн асуудлыг хамран бичдэг болжээ. Түүний урын санд 150 орчим туурь, хэдэн арван зураглал, уянгын болон гүн ухааны эсээ, жүжгийн зохиол, шүлэг ордог юм.
Японы уран зохиолд түүний үзүүлсэн нөлөө асар их бөгөөд 1935 онд Р. Акутагавагийн нэрэмжит шагнал бий болгожээ.
Эх сурвалж: "Хүүхэд, залуучуудын нэвтэрхий толь-3" (1988 он)
