Зохиолч: Акүтагава Рюүносүкэ
Орчуулагч: Д. Алтанцэцэг
Ангилал: Адал явдалт японы уран зохиол
Хэвлэлийн газар: Тодорхойгүй
Тамгын газрын түшмэлд байцаагдах модчины мэдүүлэг:
Жаа, тийм билээ. Тэр цогцсыг олсон нь эргэлзээгүй би мөн билээ. Өнөө өглөө явдгаараа уулын арын хуш модыг огтлохоор гартал уулын бэлийн шугуйд үхдэл байхыг олж харсан билээ. Байсан газар нь уу? Ямашинагийн өртөө замаас хагас бээрийн зайтай, амьтан хүн явдаггүй, нарийхан хуш мод холилдон ургасан өтгөн хулсан шугуй дотор билээ.
Тэр үхдэл усан цэнхэр өнгийн кимонотой, хот маягийн өндөр, зууван хүрэн малгай өмссөн чигтээ дээш харан тэрийн унасан байсан. Хэдий ганц газартаа хутгалуулсан авч яг цээж рүү нь дүрсэн байсан тул үхдэлийн ойр хавийн хатсан өвс ногоо нэлэнхийдээ улаан ягаан. Үгүй, цус хэдийн урсахаа больсон байсан. Шархны амсар нь ч гэсэн хатаж хатуураад, нэг хар батгана л миний хөлийн чимээг сонсох ч сөхөөгүй шарх дээр нь тас наалдаад шимж суусан билээ...
