АРИСТОТЕЛЬ
(МЭӨ 388-322)
Аристотель бол эртний Грекийн гүн ухаантан Платоны шавь юм. Гэхдээ Аристотель Платоны сургуулиас тусгаарлаж Афинд өөрийн бие даасан сургууль ликей байгуулж «Физик», «Метафизик», «Оюун санааны тухай», «Аналитик», «Категори», «Улс төр» зэрэг алдарт зохиолуудаа бичсэн бөгөөд нийт 150 орчим бүтээл туурвижээ.
Аристотелийн зохиолууд нь нэвтэрхий толь бичгийн шинжтэй бөгөөд маш өргөн хүрээтэй асуудлыг гүнзгий авч хамарсан байдаг юм. К. Маркс «Эртний аугаа их сэтгэгч» гэж Аристотелийг нэрлэж байсан бөгөөд эртний грекийн философичдын дотроос Аристотель бол «хамгийн өргөн, олон талтай нэвтэрхий толгой» байлаа гэж Ф. Энгельс өндөр үнэлж байв.
Аристотелийн нэг түүхэн үнэт гавьяа бол шинжлэх ухаанд ангилалт хийж, философийн шинжлэх ухаан биеэ даасан тусгай шинжлэх ухаан болохыг нотолж, түүний роль, ач холбогдлыг нэн товойлгон тавьсанд оршино. Аристотель философийн олон асуудлыг материалист байр сууринаас үзэж байсан ч гэсэн идеалист хандлагаас салж чадаагүй билээ. В. И. Ленин «Философийн дэвтрүүд» гэдэг зохиолдоо Аристотелийн философийн үндсэн онцлогийг Платоны идеализмтай харьцуулан тавих үндсэн дээр тодорхойлсон юм. Тэгэхдээ Аристотелийн идеализм бол «Платоны идеализмыг бодоход объектоо алслагдсан, ерөнхий шинжтэй, байгалийн философийнхоо хувьд ихэвчлэн материалист байсан юм» гэж В. И. Ленин бичжээ. Аристотель Платоны бодисын анхдагч шалтгаан нь үзэл санаа мөн гэдэг сургаалыг шийдвэртэй шүүмжилж байсан явдал үнэн хэрэг дээрээ идеализмын үндсийг тасалж, материализмын байр суурийг бэхжүүлэхэд объектоо нөлөө үзүүлсэн хэрэг юм аа гэж В. И. Ленин цохон тэмдэглэжээ. Үүгээрээ Аристотель Эртний Грекийн их сэтгэгчдийн дотор нэг ноён оргил нь болж чадсан юм.
Манай оронд Аристотелийн «Туурвил зүй» зэрэг бүтээл нь хэвлэгджээ.
Эх сурвалж : Хүүхэд, залуучуудын нэвтэрхий толь - 3 (1988)
дэлгэрэнгүйг Wiki-гээс
