Гюстав Флобер
(1821-1880)
19-р зууны европын томоохон зохиолчдын нэг, францын реалист зохиолч.
Дэлгэрэнгүйг Wiki-гээс
Хүүхэд залуучуудын нэвтэрхий толь (3-р боть, 1988)-иос:
Өрнөд Европын шүүмжлэлт реализмын том төлөөлөгч, францын нэрт зохиолч Гюстав Флобер Руан хотод мэс засалч эмчийн гэр бүлд төржээ.
Багаасаа уран зохиолд дур сонирхолтой болж, арваад настайдаа эмгэнэлт жүжиг зохиож, нөхдийнхөө хамт гэртээ тоглодог байв.
Г. Флобер 1840 онд эцэг эхийн саналаар хуулийн мэргэжилтэй болохоор Парис хотод очжээ. Гэвч эцгээ нас барсны дараа 1845 оноос Руаны ойролцоох Круасс эдлэндээ суурьшин аж төрж, уран зохиол оролдох болжээ. Нэлээд хожим Европын өмнөд тал, мөн Дорно зүгийн орноор жуулчилсан байна. «Саламбо» романаа бичиж байхдаа Эртний Карфаген улс оршиж байсан Африкийн хойд нутгаар явж үзжээ. Түүнээс хойш өөрийн эдлэнгээс бараг гадагш гаралгүй зохиол бичих ажлаа хийж, хааяа нэг Парист очиж И. С. Тургенев, Эдмон де Гонкур, А. Доде, Э. Золя нар, мөн өөрөө ордог байсан «тавын дугуйлан» гэгчийн нөхөдтэйгөө уулзан санал бодлоо солилцож зохиол бүтээлээ ярьдаг байв.
Г. Флобер зохиолоо маш нарийн бодож боловсруулан, нягт нямбай бичдэг учир харьцангуй цөөн зохиол бичжээ. Түүний томоохон бүтээл гэвэл 1857 онд бичсэн «Бовари хатагтай», 1860-аад оны үед бичсэн «Саламбо», «Сэтгэлийн хүмүүжил» зэрэг роман юм. Үүнээс гадна «Хутагт Антоний» жүжиг, «Эгэл сэтгэл», «Иродиа», «Хутагт Юлиан Хачины домог» зэрэг гурван тууж зохиожээ.
«Бовари хатагтай» романы сэдэв нь романтик мөрөөдөл, бодит амьдрал хоёрын зөрчил байв. Энэ романаараа хөрөнгөтний мохоо, оюун санааны хувьд зэрэмдэг явцуу сонирхол, хууран мэхлэх арга явуулгыг илчлэн, амьдралын үнэнийг дүрслэхийн оронд гоёж чимэглэдэг харгис уран зохиолыг буруушаан шүүмжилсэн байна. Ийнхүү Г. Флобер хөрөнгөт ёсыг шүүмжилж, түүнийг үзэн яддаг байсан учир уг нийгэмд нэг талаар сайн сайхан юм, сайн хүн байхгүй гэсэн алдаатай үзэл баримталж, олон түмний хүч, хувьсгалт хөдөлгөөний ирээдүйд итгэхгүй байжээ.
Г. Флобер МЭӨ III зуунд Карфагены эсрэг боссон хөлсний цэргийн бослогын тухай 1862 онд «Саламбо» романаа бичсэн байна. Баяжих завшихыг урьдал болгосон Карфагены ихэс дээдсийн байдлаар Францын санхүүгийн хөрөнгөтнийг үзүүлжээ. Тэрээр хөрөнгөт нийгмийг шүүмжилж байсан боловч түүний ноёрхлын эсрэг ухамсартай тэмцэж байсан хэсгийн талд туйлбартай орж чадаагүй юм.
Г. Флоберийн «Бовари хатагтай» зохиол монгол хэлээр орчуулагджээ.
