Маргааш нь Шарль өглөөний есөн цагт фермд ирсэн байв. Эмма түүнийг харснаа царай нь улайсан боловч ичсэнээ нуухын тулд инээмсэглэв. Аав Руо ирээдүйн хүргэн Шарлийг тэврэн мэндлэв. Юун түрүүнд хогшил хөрөнгийн тухай ярив. Тэдэнд энэ талаар хөөрөлдөх цаг их байсан ажээ. Учир нь Шарлийн гашуудах хугацаа дуусахад, хавар зуны хавьд гэрлэвэл зүйтэй байжээ. Өвөлдөө хүлээсээр өнгөрөөв. Руогийн охин хуримын юм бэлдэв. Зарим зүйлийг Руонд захиалан хийлгэв. Шөнийн хувцас зэрэг ойр зуурын хэрэгцээт зүйлийг Эмма өөрөө хувцасны загварын сэтгүүл харж байгаад оёжээ. Шарль яваад Бертод ирэхэд хуримын бэлтгэл, хоол зоог барих өрөө, зоогийн зүйлийн нэр төрлийн талаар зөвлөн ярилцах болов.
Эмма шөнө дунд дэнлүүний гэрэлд хуримын ёслол хийх хүсэлтэй байсныг аав Руо зөвшөөрсөнгүй. Тэгсээр байж хурим хийлээ. Дөчин гурван хүн хуримд ирэв. Найр арван зургаан цаг үргэлжлэв. Өглөө нь дахин найраа үргэлжлүүллээ. Дараагийн хэдэн хоногийн туршид найрын шавхруу дээр наргижээ.
