ЦАХИМ НОМ

ЖОН РИД

(1887—1920)

Тэрээр Америкийн Портленд хотод төржээ.  Морристауны коллеж, Гарвардын их сургууль төгсөж, эрдмийн зэрэг хамгаалжээ.  Гол мэргэжил нь сэтгүүлч бөгөөд 1913 онд «Патерсоны дайн» гэдэг найрууллаа нийтлүүлж, 1914 онд «Тэмцэж боссон Мексик» гэдэг ном туурвисан байна.  Тэр дэлхийн I дайны үед фронтод сурвалжлагчаар явж, 1916 онд «Дорнод Европын дайн» гэдэг тэмдэглэлийн ном бичжээ.  1917 онд гэргий Л.  Брайантын хамт Петроградад ирж их хувьсгалын тухай сурвалжлан, 1918 онд «Улаан Орос» гэдэг цуврал сурвалжилга бичсэн юм.  Мөн онд Бүх Оросын Зөвлөлүүдийн III Их хуралд тэр оролцож үг хэлсэн байна.

1918 онд АНУ-д буцаж очоод Октябрийн хувьсгал, Орос орны талаар өргөн сурталчилж лекц яриа хийж байсан учир хэд хэдэн удаа баривчлагджээ. Ж.  Рид «Уншигчдадаа илгээх бичиг», «Оросын хувьсгал хэрхэн тогтож байна» хэмээх цуврал өгүүллүүд бичжээ.  1919 оны III сард Нью-Йорк хотноо «Дэлхийг донсолгосон арван өдөр» гэдэг алдарт номоо туурвисан билээ.  «Оросын ажилчид бол хувьсгалчид юм.  Тэд ...  дэлхий дахины ажилчдын дотроос өөрсдийн туршлага дээрээ суралцсан цорын ганц анги болой.  Большевикуудын нам бол эвдэн сүйтгэгч хүчин биш бүтээн босгох программ, хангалттай эрх мэдэл эзэмшсэн түүнийгээ ч амьдралд хэрэгжүүлэн биелүүлж чадах Орос орон дахь цорын ганц нам» гэж Жон Рид уг зохиолдоо бичжээ.  Октябрийн аугаа их хувьсгалын туульс болсон энэхүү бүтээл америкийн утга зохиолд анхны социалист реализмын бүтээл болон алдаршжээ.

Ж.  Рид АНУ-ын Коммунист Намыг байгуулахад гар бие оролцсон бөгөөд 1919 оны намар Зөвлөлүүдийн оронд эргэн ирж Коминтернд ажиллаж байхдаа Коминтерны II Их хурал, Бакуд болсон Дорно дахины ард түмнүүдийн анхдугаар Их хуралд оролцжээ.

Цогт хувьсгалч, энэрэнгүй үзэлт, нэрт сэтгүүлч Ж.  Рид уран бүтээлийнхээ ид цэцэглэлтийн үед хүндээр өвчилж Москва хотноо нас баржээ.  Түүний «Дэлхийг донсолгосон арван өдөр» ном монгол хэлээр орчуулагдан гарсан юм.

Эх сурвалж : Хүүхэд залуучуудын нэвтэрхий толь - 3 (1988)

Зохиолч (орчуулагч)-ийн номууд

Өнөөдөр: 4494
Сүүлийн 7 хоног: 35834
Сүүлийн 1 сар: 270775
Нийт хандалт: 10215389