ЦАХИМ НОМ

Хенрих Манн

Хенрих Манн
(1871 — 1950)

Германы нэрт зохиолч, нийгмийн зүтгэлтэн, нийтлэлч, зохиолч Томас Манны ах.

Хенрих Манн Берлиний их сургуульд суралцаж байх үеэсээ зохиол бичиж эхэлжээ.  Тэр анхныхаа «Гайхамшгийн оронд» хэмээх зохиолоосоо эхлэн Пруссын харгис үзэл санаа, хөрөнгөтөн баячуудын хэмжээгүй эрхийн эсрэг тэмцжээ.  Дэлхийн I дайны үед Германы эзэнт улсын дэглэм, ард түмний эсрэг явуулж байгаа империалист хөрөнгөтнүүдийн төрийн бодлогыг илчилсэн нийтлэл олныг бичжээ.  Мөн дайны эсрэг «Үнэнч зарц нар», тэр үеийн нийгмийн бурангуй үйл ажиллагааг илчилсэн «Их хэрэг», «Дампуурсан амьдрал» зэрэг роман бичсэн юм.  Засгийн эрхэнд гарсан фашистууд түүний зохиол бичих эрхийг нь хасаж, бүтээлүүдийг нь шатааж байсан учир Х.  Манн Эх орноо орхин Чехословак, Франц, АНУ-д очиж он удаан жил тэнд амьдарч байхдаа фашизмтай идэвхтэй тэмцэл хийж, «Үзэн ядах нь», «Хүлээсэн өдөр ирнэ», «Эрэлхэг зориг» зэрэг ном зохиол бичжээ.

Октябрийн социалист их хувьсгал Х.  Манны уран зохиолын болон ертөнцийг үзэх үзэлд ихээхэн нөлөөлсөн билээ.  Тэр социализмын түүхэн ач холбогдлыг танин мэдэж, Германы коммунист намын гишүүдтэй ойртон танилцаж, Эрнст Тельман болон Гамбургийн ажилчин Эдгар Андре зэрэг коммунистуудын дүрийг харуулсан олон нийтлэл бичжээ.  Тэр «Багш Гнус болон нэг яргачны төгсгөл», «Жижиг хот», «Дурлалын хойноос явсан нь», «Толгой», «Ядуучууд», «Үнэнч зүтгэгч» зэрэг олон роман бичсэн бөгөөд түүнээс «IV Генрихийн идэр нас», «IV Генрихийн хожуу үе» гэдэг зохиолууд түүний уран бүтээлийн оргил нь байв.

Тэр бас фашист Герман Чехословакийг түрэмгийлж байх үеийн тухай «Лидице» гэдэг роман бичсэн юм.  Х.  Манн 1946 онд «Эрин цагийн тойм» нийтлэлийн ном, «Амьсгал» гэдэг роман бичсэн бөгөөд БНАГУ байгуулагдахад баяртай угтаж, бүх хүчээ энх тайвны төлөө, нэгдмэл ардчилсан Германы төлөө үйл хэрэгт зориулахаа илэрхийлж байв.  1950 онд түүнийг БНАГУ-ын Урлагийн Академийн ерөнхийлөгчөөр сонгосон боловч Эх орондоо буцаж ирэхийнхээ өмнөхөн насан өөд болжээ.

Эх сурвалж : "Хүүхэд залуучуудын нэвтэрхий толь - 3" (1988 он)

Дэлгэрэнгүй Wiki-гээс

Зохиолч (орчуулагч)-ийн номууд

Өнөөдөр: 3914
Сүүлийн 7 хоног: 53084
Сүүлийн 1 сар: 251945
Нийт хандалт: 9591430