Тухачевскийг цаазалснаас хойш ес хоногийн дараа цэргийн хуйвалдаанд оролцсон хэмээн 980 дээд болон ахлах тушаалын офицерыг баривчилжээ. Тэдгээрт бие махбодын эрүү шүүлт сайн хэрэглэж, шинэ шинэ нэр хэлүүлж авахыг Сталин тушаажээ.

Нөхөр Сталины тушаалыг биелүүлэн, шинээр баригдсан цэргийнхний урт урт нэрсийн жагсаалтыг орой болгон Кремльд авчрах болж, МАНЬ ХҮН тэр жагсаалт дээр “Буудан алах саналтай. И. Ст.” гэж хөх будгийн харандаагаар цохно. Цорын ганцхан удаа буудан алах гэдгийнхээ оронд шоронд хийх гэж бичжээ.

Нөхөр Сталин завгүй байж таарвал нэрсийн жагсаалтыг түүний журмын нөхөд Молотов, Каганович, Ворошилов, Щаденко нарын хэн нэгэнд, эсвэл Мехлист гардуулна. Тэд нар нөхөр Сталин шиг “Буудан алах саналтай” гэж цохно. Гэхдээ нөхөр Сталинаас ялгаатай нь хэний ч буудан алах ялыг хорих ялаар солиогүй. Айцгааж байхгүй юү.

Тухачевскийг шүүсэн долоон жанжнаас Блюхер, Белов, Дыбенко, Каширин, Алкснис тав түдэлгүй өөрсдөө цаазлуулжээ. Зөвхөн Шапошников, Буденный хоёр мэнд үлджээ.

Цэргийн зөвлөлийн зуун найман гишүүнээс зөвхөн арван хүн амьд үлдсэний дотор Ворошилов, Шапошников, Буденный гурав оржээ.

Цэргийн зөвлөлийн хурал дээр үг хэлсэн дөчин хоёр хүний гучин дөрвийг буудан алсан бөгөөд мэнд үлдсэн наймын дотор Ворошилов, Шапошников, Буденный гурав байлаа.

Бүтэн хагас жилийн дараа, 1938 оны арван нэгдүгээр сарын 29-нд Батлан хамгаалахын ардын комиссар Ворошилов, “1937, 1938 оны турш бид өөрсдийнхөө эгнээг хайр найргүй цэвэрлэх ёстой байлаа... Хамгийн дээд оройноос эхлээд бүр ёроол хүртэл бүх талыг хамарсан, үндсэн цэвэрлэгээ хийлээ... Бид дөрвөн түм гаруй хүнийг хуу шүүрдэн цэвэрлэлээ... “ гэж ам бардам мэдэгджээ.

Энэ хамгийн боловсролтой, туршлагатай, авьяаслаг дөрвөн түм гаруй хүн бол Улаан Армийн дээд болон алхах тушаалын командлалын тэн хагасаас илүү хувь нь юм.

Нөхөр Сталин Зөвлөлт Холбоот Улсыг ирээдүйн дайнд ингэж бэлтгэж байжээ.