Германы их зохиолч Иоганн Вольфганг Гетегийн «Залуу Вертерийн шаналан» гэдэг роман 1774 онд анх хэвлэгдэн гарчээ. Уншигчдын зүрх сэтгэлийг хамгийн ихээр хөдөлгөсөн ийм зохиол тэр үеийн Германы утга зохиолын түүхэнд бараг байхгүй байжээ. Гете зохиолыг бичихдээ юуны өмнө хувь золгүй эх орон, ард түмэн, үеийн нөхөд, өөрийгөө бодож эрх чөлөө гэдэг бол, зөвхөн мөрөөдөхөөс өөр аргагүй зүйл, энэ дэлхийд ганцхан дарлал мөлжил, эрх тэгшгүй байдал ноёрхож байна гэдгийг санажээ. Хорин гурван настай Гете 1772 онд Вецлар хотноо ирж орон нутгийн шүүхийн газар ажиллаж байх үедээ тэндэхийн түшмэлийн охин үзэсгэлэн гоо Шарлотта Буфф гэдэг бүсгүйд ухаангүй дурласан явдал энэ роман бичихийн шалтгаан болжээ.
