Хүүхдийн хоёр нүднээс тэр гэрэл гэгээ цацарч, инээмсэглэж байгаа ягаахан уруул амнаас нь болжморын шулганаан шиг дуу сонсогдох нь хөгжил баясгалантай бяцхан Христина байлаа. Жаал охин Ибийн өвөр дээр эрхлэн сууна. Төрүүлсэн эцэг эхээ аль эртийн зүүд мэт мартсан бяцхан охинд Иб эцгийнх нь оронд эцэг, эхийнх нь оронд эх болжээ. Иб одоо ургаж цэцэглэж байгаа бяцхан Христинагийн хамт чинээлэг аж төрж байна. Харин охины ээжийг Копенгаген хотод ядуусын оршуулгын газар нутаглуулжээ.
