185... оны өвлийн дунд сарын үес манай батарейн нэгэн дивизион Их Чечна хэмээх газар хуарагнав. Даргыг нь байхгүй хойгуур миний орлож байсан салаа, маргаашийн мод огтлох цуваанд гарах болсныг хоёрдугаар сарын 14-ны үдэш дуулаад тэр дороо зохих тушаалыг дамжуулж урьдаас арай эртхэн майхандаа ирэв. Сууцаа галын цогоор дулаацуулдаг бээрэг зан хараахан сураагүй болохоор ханзан дээр үстэй дээлдээ шигдэж, папах малгайгаа духдуулаад түгшүүрийн үед ч аюулт мөчийн өмнөхөн ч унтаж чаддаг тийм бөх нойронд дарагдав. Маргаашийн ажлаа бодсоор ийм байдалтай болсон биз ээ.
Үүр цайх яагаа ч үгүй байхад гурван цагийн үед нэг хүн халуу дүүгсэн нэхий дээлийг минь хуу татсанд, лааны улбар хүрэн гэгээнд нойрмог нүд хачин эвгүй гялбав...
