Гар нь нугаран хүүхэн нүүрээрээ газар харуулдан унахдаа дахин орилон бархиран хөлөө татганан жийв. Би бачимдан сандарч, энэ талаар юу мэдэхээ хурдан цугларуулан бодоод, түүнийг дээш нь хандуулан хэвтүүлж, хөлийг нь нугалахад хальс нь хэдийнээ цухуйжээ, хэвтэж бай, одоо төрөх нь... гээд би ус руу гүйн очиж ханцуйгаа шамлан гараа угаамагц буцаж ирээд, эх баригч боллоо.
Хүүхэн гал дотор орсон үйс мэт эвхрэн холбирон гараараа эргэн тойрны газрыг цохиж, шарласан өвсийг зулгаан, цус бүрхсэн догшин нүдтэй хүний дүргүй аймаар нүүрээ шороогоор булж байтал хүүхдийн хальс хагаран толгой нь бултайж гарахад би хөлийг нь таталдахыг сааруулан дарж, хүүхдийн цухуйн сугарахад туслан, бас хүүхэн мурийн ангайж бархиран амандаа өвс чихүүзэй гэж анзаарах хэрэгтэй болов...
