— Байдал цаанаасаа ийм болжээ гэдгийг би бас ойлгоно. Хаашаа ч зайлахгүй... Тэнэг хүн л нударга зангиддаг юм. Хэрэв улсад хэрэгцээ байгаад бидний хөрөнгө зөөрийг нимгэлэх юм уу, бүрмөсөн хурааж авсан ч бидний өвөгчүүл үүнийг ойлгоно. Улс бол хүнийг хамгаалдаг, тэднийг дэмий гомдоохгүй гээд, гараа дэлгэж, мөрөө хавчиж, хууз нүүр, хүйтэн нүдээр юмыг огт ойлгохгүй байгаа байдал илэрхийлэн эцэст хэлсэн нь,
— Хөрөнгө зөөрөө хамтралд сайн дураараа өгнө гэдгийг бид яасан ч ойлгож чадахгүй юм. Сайн дураар хэн ч юу ч хийхгүй, аль эрт дээр үеэс хүн болгон гачигдсаар ирсэн юм. Христос ч гэсэн сайн дураар загалмайд хадагдахгүй байсан биз. Түүнд эцэг нь тушаасан юм шүү дээ гэв.
Тэр бээр нэг банз авч шонгийн толгой дээр тавьж үзээд найтааж, тун өрөвдөлтэй өгүүлсэн нь,
— Бид энэ сурсан заншлаараа амьдраад л үхэх юм сан гэв.
Тэр хүн түүдгийн галаас холдон явахад салхин түүний хойноос чандруу хийсгэнэ. Янцаглан бөхийж газраас нэг банз өргөөд,
— Өвгөчүүл одоо хэдийхэн наслах вэ дээ. Бид залуу хүмүүст хэнд ч саад хийсэнгүй. Тэд дураараа амьдраг, муур шиг таргалаг... гэв.
Цуцлаас май татаж, мушгирсан хөх утаа голын дээгүүр хийснэ.
