Зохиолч: Алексей Бадмаев
Орчуулагч: Т. Содномдаржаа
Ангилал: Оросын уран зохиол
Хэвлэлийн газар: Улсын хэвлэлийн газар
Бага дөрвөдийн улсын өргөө нь хорин намхан шавар байшингаас бүрдэх бөгөөд тэдний дунд бас төөнөх халуун нар, талын чимчигнэх салхинд харласан хоёр модон байшин байх ажээ. 1917 оны намар хүртэл тэдгээр модон байшингийн нэгэнд улсын захирагч Богданов гэр бүлтэйгээ суудаг байлаа. Сийлмэл довжоотой, дөрвөн тасалгаатай нөгөө нэг байшинд нь албан өрөө, хааны түшмэд байрладаг байлаа. Хоёрдугаар сарын хувьсгалын дараа модон байшингуудад земийн захиргаа байрладаг болжээ. Октябрийн хувьсгалын өмнөхөн улсын земийн захиргааны даргаар улсын ноён Данзан Тундутов, багш Араши Чапчаев хоёрын нэр дэвшигджээ. Хэдийгээр ноёныг дэмжсэн өргөн ухуулга явуулж, ядуучуудын дунд аливаа амлалт гаргаж, туйлбаргүй хүмүүсийг худалдан авч байсан боловч сонгуулийн дүн багшийн талд ашигтай болжээ. Учир нь ядуучуудыг өмгөөлөгч аймшиггүй энэ хүн тал даяар маш нэр цуутай ажээ...
