Зохиолч: Юрий Нагибин
Орчуулагч: Ж. Лхагва
Ангилал: Оросын уран зохиол
Хэвлэлийн газар: Улсын хэвлэлийн газар
Багадаа би унадаг дугуйтай болохын дон шүглэж, сэтгэлийн түг болж явлаа. Одоо ч гэсэн бяцхан жаалууд гинжит дугуйгаар зугаалж, арай томхон нь хэрээс хэтэрсэн ганган дугуй унаж явахыг харахад багын гомдол зүрхнээ дахин хэнзэлдэг шүү. Миний багад ийм гоё дугуйнууд ор сураггүй байж дээ. Зөвхөн том хүний дугуй л байх. Тэр нь бас өдрийн од шиг ээ. Зөвлөлтийн анхны дугуй «Украина» дөнгөн данган хөлд орж... «Оппель-Латвелла», «БСА» зэрэг үнэ хадсан гадаад дугуйнууд хаа нэг үзэгдэнэ.
Манайхны суудаг аварга том байшинд л гэхэд дугуйтай хүүхэд ганцхан байлаа. Хөл нь дөрөөндөө хүрэхгүй тэр амьтан тарган нугас алцганаж явахын адил эмээл дээрээ холбилзох нь хэдийгээр инээдтэй боловч бидэндээ тэгэхэд атаархам сайхан зүүд байлаа...
