Зохиолч: Нур Мохаммад Тараки
Орчуулагч: Д. Дамдинсүрэн
Ангилал: Гадаадын уран зохиол
Хэвлэлийн газар: Улсын хэвлэлийн газар
Банг хэдэн цагийн хойно горхинд хүрээд газар сууж уутнаасаа бага зэрэг улаан буудайн нэвс, атга ялам гарган идсэнээ, «Замд саатаж дөтийн тосгонд хүрч амжихгүй болбол хүч сэлбэх юм нөөцлөн үлдээвэл зүгээр шүү» гэж бодов. Банг тосгонд хоноглож, өглөө мөргөл үйлдээд замд дахин гарав. Түдэлгүй нэг довцог харагдлаа. Банг зогтуссанаа цааш явахыг завдтал нэг хүн:
— Зогс! Уутаа хая! гэж гэнэт дуугарав.
Дуу гарсан зүг эргэвэл хэдэн хүн том чулууны дэргэд тухлан суусан үзэгдлээ. Тэдний нэг Банг руу буу чиглүүлэхэд «Дээрэмчид!» гэсэн бодол түүний толгойд зурсхийн уутаа хөсөр хаяж гар өргөсөнд дээрэмчин:
— Хөөе чи! Ганцаар яваа юу, олуулаа юу? гэж хашхирлаа...
