ГЕОРГИЙ СВИРИДОВ МОНГОЛ УНШИГЧ НАРТ

Миний «Өргөст торон дотор... гэдэг ном манай оронд олон хэлээр хэдэн удаа хэвлэгдэн гарсан тул уншигч нараас захидал олныг авч байна. Зөвлөлтийн уншигчдаас гадна харь орны хүмүүсээс захидал ирсээр байна. Энэ олон уншигчийн сонирхож байгаа нэгэн зүйл бол «Таны номд гарч байгаа зүйл үнэхээр болсон явдал уу? Үхлийн лагерьд байсан тэр хүмүүсээс амьд үлдсэн хүн байна уу?» гэдэг асуулт юм.

Би энэ асуултад «Тиймээ, энэ бүхэн цөм үнэн» гэж товчхон хариулдаг. Миний номд санаанаас зохиосон юм огт үгүй. Гарч байгаа үйл явдал цөм үнэхээр болсон юм шүү. Би энэ номыг бичих гэж архивын материал, түүхэн баримт судалж, «Бухенвальд» хэмээх үхлийн лагерьд гарсан домогт бослогод оролцсон хүмүүстэй биеэрээ уулзаж, тэдний ярихыг сонссон юм.

...

Фашистын хар зандалчид, Монголын номин талд хөл тавиагүй гэдгийг би мэднэ. Гэвч гучин жилийн өмнө фашистын Германы баруун гар болсон японы түрэмгийчүүд монголын нутаг дээр ямаршуу муухай хэрэг гаргасныг сайн мэднэ. Ширүүн тулалдааны талбараас ирсэн түгшүүрт мэдээг сонсож байсан маань ч, монголын морьт цэрэг. зөвлөлтийн танкчдын эрэлхэг гавьяаг дуулаад бахархаж байсан маань ч ив илхэн байна. Ер нь Халх голд японы булаан эзлэгчдийг бут цохисон явдал фашистын Германы гол хүчийг Сталинградын дэргэд бут цохихын дохио болсон гэж хэлэхэд буруудахгүй байх аа.

Манай хоёр ард түмний найрамдал бол эрх чөлөө тусгаар тогтнолын төлөө алтан амиа өгсөн зоригт хөвүүдийн маань цусаар гагнагдсан билээ. Манай ард түмнүүд нэгэн эгнээнд мөр зэрэгцэн бат зогсож байдаг тул бидний найрамдлыг эвдэх гэсэн хэн боловч сайнаа үзэхгүй нь лавтай юм.

Миний «Өргөст торон дотор... » гэдэг ном бол зөвхөн уран зохиол биш орон бүрийн фашизмын эсрэг тэмцэгчдийн интернационалч эв нэгдэл, эрэлхэг хатуужлын дурсгал болно.