Зохиолч: М. Горький
Орчуулагч: С. Бадраа
Ангилал: Оросын уран зохиол
Хэвлэлийн газар: Улсын хэвлэлийн газар
Би сонины хуудас гүйлгэн харж байтал Коновалов гэдэг нэр дайралдав. Сонирхож уншвал:
«Өчигдөр шөнө нутгийн шоронгийн 3 дугаар өрөөнд Мурома хотын энгүүн ард 40 настай Александр Иванович Коновалов пийшингийн хаалтаас боомилон үхжээ. Амиа хорлогч хэрэн тэнэж яваад Псков хотноо баригдаж төрсөн нутагтаа хүргэгдсэн байна. Гяндангийн эрх баригчдын ярих нь энэ хүн бол үргэлж бодол бодон суудаг дуугай номхон хүн байжээ. Коноваловын амиа хорлосон шалтгааныг гяндангийн оточ тодорхойлохдоо, бухимдсанаас болсон байна гэж дүгнэсэн байна»
гэжээ.
Би тэр хүнийг таних тул энэ товч мэдээг уншаад тэр бодлого болсон хүний аминаасаа уйдсан шалтгааныг бага зэрэг тодруулж болох бол уу гэж бодлоо. Тэр ч байтугай би түүний тухай дуугүй өнгөрөх ёсгүйн учир нь гэвэл тэр хүн бол амьдралын замд тэр бүрий тааралдахгүй алдартай сайн залуу байсан юм...
