ДЕКАМЕРОНЫ ЕС ДЭХ ӨДӨР ДУУСАЖ СҮҮЛЧИЙН, АРАВ ДАХЬ ӨДӨР ЭХЭЛЖ БАЙНА
Панфилогийн захиран засагласан эл өдөр янаг амрагийн явдал хийгээд ер аливаа ажил үйлст өгөөмөр сэтгэл, өршөөл энэрлээ харуулсан хүмүүсийн тухай туурийг толилуулна
Өрнө зүгт үүлс цайвалзсан хэвээрээ байхад дорно зүгт Нарны туяа нэвт туссан үүлсийн зах нь гал дүрэлзэх мэт туяаран байх үес Панфило нойрноос дээшилж, бүсгүйчүүд болон найз залуусаа дуудан цуглуулахыг зарлиг болов. Бүгдээр цугларахад Панфило өнөөдөр чухам хаашаа явж цэнгэн зугаацахыг тэд нартайгаа зөвлөн ярилцаад Филомена, Фьямметта нар алгуурхан алхлан урагшаа явж, тэдний араас бусад нь дагалдав. Тийнхүү нэлээд удаа зугаалан явах зуур ирээдүйд тэднийг чухам юу хүлээж байгааг тааж ядан байгаад Наран төөнөж эхлэх үес ордондоо эргэж ирцгээлээ. Юм уух хүсэлтэй нэг нь аяга угаалган авч цангаагаа тайлаад дараа нь үдийн зоог болтол бүгдээр цэцэрлэгт, модны сүүдэр дор тухлан цэнгэцгээлээ. Дараа нь хоолоо идэцгээж, дадсан заншлаар жаахан унтаж амраад хааны таалан сонгосон газар дахин цугларч, хаантан, Нейфилийг ярьж эхэл хэмээн зарлиг болсонд бүсгүй хөгжил баясгалантай ийн ярьж эхлэв:
