Жованни Боккаччо
(1313—1375)
Европын сэргэн мандалтын үеийн энэрэнгүй утга зохиолын анхны төлөөлөгчийн нэг нь Италийн Флоренц хотод худалдаачны гэр бүлд төрсөн нэрт зохиолч Жованни Боккаччо билээ. Эцэг нь хүүгээ худалдаачин, хуульч болгох гэж зүтгэсэн боловч багаас яруу найргийн амтанд орсон Жованни хүү эцгийн үгээс зөрж, шүлэг зохиол оролдох болжээ. Тэгээд 1340-өөд оноос шүлэг зохиол бичиж, энэрэнгүй үзэлтнүүдтэй танилцжээ. Тэрээр «Филострато», «Тесейн дуулал» найраглал, «Фьяметта» хэмээх сэтгэлзүйн тууж, «Филоколо» роман бичиж эртний домгийн үйл явдлаас сэдэвлэн хүний сэтгэлийн ертөнцийг нээн харуулснаараа онцлогтой зохиолч юм. Тэр бас «Данте Алигьерийн амьдрал» гэдэг ном бичжээ.
Ж. Боккаччогийн зохиолын сор нь 1350-1353 онд туурвисан «Декамерон» хэмээх зохиол юм. Зохиолчийн төрсөн хот Флоренцид 1348 онд гарсан аймшигт тахлын үед эрэгтэй, эмэгтэй арван залуу тахлаас зугтаж нэгэн шилтгээнд хоргодон 10 хонохдоо хүн бүр өдөрт нэгэн зугаатай түүх буюу зуун үлгэр хэлж байгаа гаар зохиолч номынхоо зохиомжийг хийжээ. «Декамерон» гэдэг нь эллин хэлээр «Арван өдрийн тэмдэглэл» гэсэн үг юм. Уг зохиолд католик шашны бурангуй ёс, феодалын харгис нийгэм, түүний ялзарсан ёс суртахууныг илчилж, лам нарын бузар булай, харгис хэрцгий, бүдүүлэг харанхуй байдлыг элэглэн үзүүлсэн байна. Эрх чөлөөг эрхэмлэх үзэл санаа, хөгжөөнт хошигнол нэвт шингэсэн «Декамерон» хэмээх энэ зохиол дэлхийн утга зохиолын алтан сан хөмрөгт орж зохиолчийнхоо нэрийг дуурьсган үеийн үед мөнхөрчээ.
Ж. Боккаччогийн энэ алдарт зохиолын 26 бүлэг монгол хэлээр 1936 онд «Декамерон хэмээх бичиг» нэртэйгээр анх орчуулагдан уйгуржин бичгээр гараад, 1983 онд шинэ үсгээр дахин хэвлэгдсэн юм.
Эх сурвалж : Хүүхэд залуучуудын нэвтэрхий толь - 3 (1988) номоос
