Тэгтэл бидний дэргэдүүр жороо морьтой хоёр хүн галгиулан өнгөрлөө. Нэг нь зулзаган хус шиг гоолиг биетэй, нэлээд царайлаг залуухан хүүхэн байлаа. Нөгөө нь холтсоор сийлсэн зормол мэт барзгар хүрэн царайтай, мончгор улаан хамартай, нүсэр тарган биетэй хижээл эр байв.
Хоёулаа луу хээтэй улаан торгон дээл өмссөн нь гоёл биш, цам майдарын хувцас шиг санагдана. Бас хулсан өнгөт тарган жороо морьд зүс нийлүүлэн унажээ.
— Энэ аав, охин хоёр дээл хувцас, морины зүсээ хүртэл сүрхий хуарлуулж дээ, гэж би бодсоноо санаандгүй хэлтэл найз минь:
— Ха-ха-ха! Аав охин хоёр гэнээ, чи харин!... гэж элгээ хөштөл инээгээд, — Энэ чинь зургаадугаар багийн баян Дондог гуай залуу авгайтайгаа наадамд намьж яваа нь энэ байхгүй юу! гэсэнд би тоймгүй гайхаж:..
