Би дотогш орж, ирсэн тухайгаа ардын комиссарт илтгэхэд К. Е. Ворошилов надтай мэндлээд хэлсэн нь,
— Зөвлөлт Засгийн газар 1936 оны 3-р сарын 12-ны гэрээ ёсоор гаднын аливаа түрэмгийллээс хамгаалах үүрэгтэй манай найрамдалт Монгол улсын хилд японы цэрэг гэнэт халдан довтолжээ. Тавдугаар сарын 30-ны өдрийн цагийн байдлыг оруулсан тэрхүү цөмрөн орсон районы газрын зураг энэ байна гэлээ.
Намайг газрын зураг руу ойртоход,
— Япончууд үүгээр удаан хугацааны турш монголын хилчдийн эсрэг жижиг өдөөн хатгалга хийж байжээ. Бас үүгээр Хайлаарын гарнизонд багтдаг японы цэрэг БНМАУ-ын хилийг зөрчиж, Халх голын зүүн талын энэ хэсгийг халхалж байсан монголын хилийн цэргийг дайрсан байна гэж газрын зураг дээр заав. Тэгээд:
— Тэд цэрэг дайны ноцтой балмад явдал гаргах гэж байх шиг байна. Юу ч гэсэн энэ төдийгөөр уг хэрэг дуусахгүй байх. Та нэн даруй тийшээ нисэж, хэрэгтэй болбол тэндэх цэргийн командлалыг гартаа авбал ямар вэ? гэж хэлэв. Би тэгэхэд нь:
— Одоо энэ мөчид ч явахад бэлхэн байна гэв.
— Тэгвэл маш сайн. Таны явах онгоц 16 цагийн үед нисэхийн төв буудал дээр бэлэн болно. Та одоо Смородинов дээр орж, шаардагдах материал аваад жанжин штабтай яаж холбоо барихыгаа ярилцана уу. Цөөн тооны мэргэжлийн хэсэг офицер таны мэдэлд явахаар онгоц руу очих болно. Баяртай! Амжилт хүсье гэв.
