Шөнийн түмэн нууцгай дуу: бухимдан уйлаад байгаа юм шиг, хөхрөөд ч байгаа юм шиг цөөвөр чонын тээр холын гунигтай улиан, хүрэлзгэнэ, мэлхий, бөднийн нэгэн жигдийн ая, юуных нь бүү мэд нэг л ойртоод байгаа хүнгэнээн, түмэн бодисын ойлгож ч болохгүй, тодорхойлж ч болохгүй дуулдах төдийхөн шөнийн хөдөлгөөн нэгэн бүтэн сайхан эгшиг дуу болж нийлэн бидний ярьдгаар бид шөнийн анир сонстоно. Энэхүү аниргүй байдал эвдэгдэж улмаар өндөр ногоон дундуур аажуухан явж байгаа отрядын морьдын хөлийн битүү дуутай нийлжээ.
Жагсаал дундаас хааяа хүнд их бууны доргио дуун, жадны хавираан, дүнгэр дүнгэр яриа, морьдын тургиа сонстоно.
Байгаль дэлхий хүч тэнхээ, өнгө үзэмжийг хослууланхан жаргаж байна. Эх захгүй одот тэнгэрийн доорх энэ сайхан дэлхийдээ хүн төрөлхтөн багтаж амьдрахгүй байна гэж үү? Ийм сайхан байгаль дунд сууж байгаа хүний санаанд хорлох, өслөх санаа буюу өөртэйгөө адилыг устгах хэнээ байна гэж үү? Өгөөмөр санаа өнгө үзэмжийн биет баталгаа болсон энэ сайхан байгалиа хараад хүний санаанд явдаг мулгуу бүхэн арилмаар л юм даа.
