хотод гэв гэнэт огт санаандгүй Солигаличийнхнаар үл барам бүхий л Оросын гэгээрсэн хүмүүс гайхаад баршгүй тийм нэг мэдээ ирсэн нь ухаанд огт багтамгүй бөгөөд засаг төрийн эмхтэй хатуу дэг журамд байж боломгүй санагдсан буюу тайж нарт бэлэглэдэг Ариун Владимирын Загалмай гэгч одонг хорооны цагдаа Рыжовт ирүүлсэн агаад энэ бол хороон цагдаад олгосон Владимирын анхны одон байжээ.
Уг одонг хэрхэн хүндлэн үзэх ба зүүж явах тухай зааврын хамт ирүүлсэн байв. Загалмай, жуух бичгийг Александр Ивановичид гардуулахдаа энэ их нэр төр, шанг Сергей Степанович Ланскойн танилцуулан санал тавьснаар олгож байгаа юм гэдгийг хамтад зарлажээ. Рыжов одонг зүүчхээд нэг харснаа дуулдахуйцаар
— Хачин хүн, хачин хүн! гэж хэлсэн бөгөөд «Цулбодолдоо» Ланскойн нэрний өмнө: «Энэ хүн гүн болно» гэж тэмдэглэжээ; энэ зөгнөл нь ч ёсоор болсон билээ. Харин Рыжов одонгоо зүүж явах хувцасгүй байлаа.
Одонт Рыжов бараг ер хүртэл наслахдаа хожим хошууны байшин сэлбэн засах ажлын үеэр хана цааслахад үрэгдсэн бололтой нөгөө «Цулбодол» гэдэг дэвтэртээ үзсэн бодсон бүхнээ өвөрмөц хичээнгүйгээр тэмдэглэсээр байжээ.
