Эсхилийн уран бүтээлийн оргил нь түмнээ алдаршсан «Цовдлуулсан Прометей» хэмээх эмгэнэлт жүжиг юм.

Энэ зохиолд өөрийн эзэн, бусад шадар бурхдын булай явуулгын эсрэг босож хүн төрөлхтний төлөө баатарлагаар тэмцэн хамгийн хэрцгийгээр тамлуулавч зориг үл шантрагч нэгэн баатар бурхан Прометейн амьдрал тодорхой гарна. Товчлон өгүүлбээс Прометей бол хүн төрөлхтний төлөө, үнэн шударга ёсны төлөө амь хайргүй тэмцэгч, хал зовлонгийн дээдийг үзсэн хамгийн гайхамшигт баатрын дүр юм. Прометей гэдэг үг нь "Зөнч" «Холыг харагч» гэсэн утгатай болго. Манай үед эрэлхэг баатарлаг үйл явдал бүтээгсдийг Прометей шиг амьдарсан хүн гэж зүйрлэх явдал олонтоо буй.

Эсхилийн Прометейн тухай суут зохиол нь «Гал хулгайлсан Прометей», «Цовдлуулсан Прометей», «Чөлөөлөгдсөн Прометей» хэмээх гурван хэсгээс бүрдсэн гэх боловч уламжлагдаж үлдсэн нь гагцхүү «Цовдлуулсан Прометей» юм.

Энэ гайхамшигт зохиол болон Эсхилийн бусад зохиолыг эх хэлэндээ орчуулж театртаа тавиагүй соёлт улс бараг үгүй гэхэд болно. Үүнээс гадна манай сургуулиудад утга зохиол заахад эртний грекийн утга зохиол, түүний дотроос Эсхилийн уран бүтээлээс үзэхгүй өнгөрөх нь үгүй ээ.

Б. Энэбиш