Тартарены адал явдлыг харуулсан зохиол бүтээх санаа хаанаас яаж төрсөн, хэрхэн боловсруулсан тухайгаа зохиогч «Миний номын түүх» гэдэгтээ өгүүлсэн байдаг. Тартарены дүр бол 1861 онд Додетэй хамт Алжираар аялсан Нийм хотын иргэн, зохиогчийн үеэл ах, Рейно гэдэг хүний дүр ажээ. Эхлээд Рейногийн дүрийг Шапатен гэдэг нэрээр бүтээсэн бөгөөд сонинд уг романы хувилбарыг нийтлүүлэхдээ Шапатеныг Барбарен гэж өөрчилсөн байна. Гэтэл Тараскон хотноо Барбарен гэдэг нөлөө бүхий нэг баян хүн үнэхээр сууж байсан учир зохиогч баатрынхаа нэрийг гурав дахь удаагаа өөрчлөхөөс өөр аргагүй болов. Хамгийн сүүлд Тартарен гэдэг нэрийг сонгон авчээ. Тийнхүү нэрээс нь эхлээд бүх зүйлийг дахин дахин боловсруулсны үр дүнд Тартарен нь уран сайхны аргаар ерөнхийлсөн хэв шинжит дүр болж чаджээ.

Доде «Тарасконы Тартареныг» бичихдээ онц нухацтай зорилго тавилгүй зөвхөн уншигчийг хөгжөөхийг бодсон гэдэг. Гэтэл уг зохиол нь адал сонин үйл явдлаас гадна маш нарийн ажиглаж, орчин үеийнхээ амьдралыг тал бүрээс нь дүрсэлсэн үнэхээр чансаатай бүтээл болжээ. Тартарены хоосон мөрөөдөл, хоосон сүр, хэт нэрэлхүү зан, ажилгүй дэмий баахан наргиан цэнгээнээр хөөцөлдөж дур сонирхол нь хоёр, гуравдугаар эзэнт төрийн үеийнхний бэртэгчин амьдрал ахуйн хэв шинж юм. Ингэж тэр үеийн нийгмийн согогийг хошин шог байдлаар дурайтал зурагласны хувьд «Тарасконы Тартарен» нь дэлхийн сонгодог уран зохиолын санд зүй ёсоор ордог юм.