Уклеево суурин жалга дотор байрласан болохоор зам дээрээс юм уу, төмөр замын өртөөнөөс сүмийн хонхны цамхаг, хөвөн цаасан даавууны үйлдвэрийн яндан цухуйн харагддаг билээ...

Сууринд хумхаа арилах нь үгүй, бас дээгүүр нь их сүүдэр бүхий хөгшин уд мод өнгийн ургасан хашааны ёроол зуны цагт ч гэсэн намгархаг шавар шавхайгаар дүүрэн байдаг ажээ. Энд үйлдвэрийн хаягдал, даавуу боловсруулахад хэрэглэдэг цууны хүчил ханхалж байдаг юм. Хөвөн цаасан даавууны гурван үйлдвэр, арьс ширний нэг үйлдвэр суурин дотроо биш захад нь зайдуу оршино. Үйлдвэрүүд төдийлөн том биш, тэдгээрт нийтдээ дөрвөн зуугаас илүүгүй ажилчин ажиллана. Арьс ширний үйлдвэрээс гол руу цутган орох ус өмхийрч хаягдал нь өвс ногоог хордуулан тариачдын мал боом өвчинд нэрвэгдсэн учир үйлдвэрийг хаах тушаал гарч хаагдсан гэж тооцогдох хэр нь хэсгийн цагдаагийн дарга, хошууны эмч хоёрын зөвшөөрлөөр нууцгай ажилласаар байгаа ажээ. Тэр хоёрыг үйлдвэрийн эзэн сар бүр арван рублиэр хахуулддаг юм санжээ. Бүх суурин даяар төмөр дээвэртэй хоёр дориун байшин байдгийн нэгэнд хошууны захиргаа байрлаж, сүмийн урдаас харсан нөгөө хоёр давхар байшинд Епифаны чинээлэг айл болох Григорий Петрович Цыбукинийх сууна...