Зохиолч: ПОЛЬ ДЕ КРАЙФ
Орчуулагч: Ш. Гаадамба Д. Дандий
Ангилал: Байгалийн шинжлэл Намтар, дурсамж Эрүүл мэнд, анагаах ухаан Түүх Америк уран зохиол
Хэвлэлийн газар: Улсын хэвлэлийн газар
Түүний бие төлөвлөгөө зохиож, хүсэлт гуйлт мянга түмээр нь өргөн дэвшүүлж, таньдаг мэддэг холбоотон хэлхээтнээрээ сүйхээлж, тэр битгий хэл, адаг сүүлд нь энэ «Юпитер» тэнгэрийн хилэнд хүртэл өртөхөөр зүрх шөвхөлсөн байна. Энэ бүхнийг зөвхөн л Өмнөд Африкт очиж, нянг агнахын төлөө үйлдсэн хэрэг. Энэ нь 1889 оны эхээр болсон билээ. Тэр тухайд Америкт Теобальд Смит гэгч хүн Техассын халуун ханиадыг нэг амьтнаас нөгөөд хачиг дамжуулан халдаадаг байна гэж нотлон, нянгийн агнуурт бүхэл хувьсгал гаргаад тун удаагүй байсан цаг бөлгөө. Иймд адал явдалд дур шуналтай Давид Брюс тэрхүү Смитын заасан замаар явахаар тогтсон нь тэр байжээ. Африк тив битүүлэг нууц элдэв хороор бялхан дүүрэн байсан тулд энэхүү эх газар дээрх аж төрөл ердөө л авид тамд адил болж байсан бөлгөө. Тэнд сийрсэн модон зэгэл ногоон ширэнгэ шугуй шуугьж, хэдэн зуун зүйлийн элдэв ялаа батгана, шумуул, хачиг, шоргоолж жүнгэнэлдэн язганан байх бөлгөө. Эсэн бусын нээлт судалгаа хийж, бичил харуур барин хөгжилтэй зугаалан, сул чөлөөтэй нянгийн агнуур хийж явахад юутай бахтай газар гэлтэй вэ!..
