Зохиолч: Веркор
Орчуулагч: Т. Төмөрхүлэг
Ангилал: Францын уран зохиол
Хэвлэлийн газар: Улсын хэвлэлийн газар
Жаал хүү бяцхан гараа санаандгүй эцгийнхээ гар луу сарвайв. Аавынхаа гарыг удтал барьсангүй дээ гэж бодлоо. Хоёулаа цэцэрлэгээс гарав. Ээж нь аавыг нь явах болгонд л гал зуухны өрөөний цонхонд ваартай шимтэглээ тавьдаг асан. Эл удаа ч мөн тавьжээ. Ингэх нь хачин ч юм шиг санагдах ажээ.
Гадаа сайхан. Тэнгэрт хэсэг бусаг сэмжин үүлс нүүх нь үзэгдмүй. Тэр хоёрт үүл сонирхон харах бодол төрөхгүй байлаа. Харин хөвүүн замын хайрга өшиглөж яваа бяцхан шаахайныхаа хоншоорыг ажиглан явлаа. Аав нь дув дуугүй. Уг нь хүүгийнхээ хайрга чулуу өшиглөх чимээ сонсоод «хөлөө өргөж явахгүй юу чи» гэж уурладаг сан. Ингэхэд хүү хэсэгхэн зуур болгоомжтой алхалснаа аажим аажмаар алдаж дахиад хөлөө пир пир чирэн эхэлдэг билээ. Яагаад ингэдгээ өөрөө үл мэддэг байв. Харин энэ удаа аав нь ер зэмлэсэнгүй. Жаал хүү гутлаа чирэхийг болилоо. Газар ширтсэн янзаараа. Эцэг нь дуугаа хураасанд хүүгийн сэтгэл зовниж эхлэв...
