Зохиолч: Н. В. Гоголь
Орчуулагч: Д. Гомбожав
Ангилал: Үлгэр, домог Оросын уран зохиол уран зөгнөл
Хэвлэлийн газар: ГЭГЭЭРЛИЙН ЯАМНЫ ХЭВЛЭЛ
Зураач уул зургийг том модон самбар дээр зурж байхад чөтгөр бүх хүчээрээ саад хийхийг оролдож гэнэт гарыг нь ёврох, дархны газраас үнс авчирч асгах зэргээр авирласан ч уг зургийг дуусгаж сүмд авчран тавьсан тэр цагаас хойш чөтгөр төмрийн дархнаас өшөө авахаар тангараглажээ. Энэ хорвоод явах нас нь ганцхан шөнө үлдсэн боловч төмрийн дарханд мууг хийх санаагаа орхисонгүй. Энэ учраас өвгөн Чуб залхуу, хөл удаантай болохоор тосгоны гадаа орших бөгөөд тээрэм, оршуулгын газрын дэргэдүүр гуу тойрч очих ламынд хүрч чадахгүй байх гэж горьдсондоо сарыг хулгайлжээ. Сартай шөнө бол Чуб архи дарсанд татагдаж болох юм. Ийм тас харанхуй шөнө түүнийг пийшин дээрээс босгон байшингаас гаргаж хэн ч чадахгүй биз. Тэгвэл хэдийнээс аваад Чубтэй эв түнжин муутай байсан төмрийн дархан хүчтэй ч атугай охинд нь ирж зүрхлэхгүй. Ингээд чөтгөр сарыг халаасандаа нуумагц дэлхий дахинаа тас харанхуй болж тэр бүр хүн ч гэлэнгийнд байтугай дарсны пүүст очих зам олж чадахааргүй болжээ. Эм шулам гэнэт харанхуй болоход хашхирчээ. Тэгэхэд чөтгөр чойрго чойрго гүйж очоод сугадан авч эм сүвтэй болгонд шивгэнэдэг нөгөө нэг зүйлийг шивгэнэж гарчээ. Хорвоогийн тавилан гэж гайхалтай юм шүү! Бие биеэ давах дийлэх санааг цөм агуулна...
